ސްޓެލްކޯ ސްޓާފް ހައުސިންގ ޕްރޮޖެކްޓްގެ ދަށުން ހުޅުމާލޭ ދެވަނަ ފިޔަވަހީގައި ތަރައްޤީކޮށްފައިވާ ސްޓެލްކޯ ހިޔާގެ 2 ޓަވަރަށް ކުންފުނީގެ އަމިއްލަ ޚަރަދުގައި ކަރަންޓުލުމުގެ އިންތިޒާމްތައް ހަމަޖެއްސުމަށް އެކުންފުނިން ނިންމައިފިއެވެ.
އެކުންފުނިން އެގޮތަށް ނިންމާފައިވަނީ ކުންފުނީގެ ޑިރެކްޓަރުންގެ ބޯޑުން ރޭ ބޭއްވި ބައްދަލުވުމުގައެވެ.
ސްޓެލްކޯއިން މި ނިންމުން ނިންމާފައި މިވަނީ، އެ ކުންފުނިން އިމާރާތް ކޮށްފައިވާ ފްލެޓްތަކަށް ކަރަންޓުގެ ހިދުމަތްތައް އެޗްޑީސީގެ ފަރާތުން ގުޅައި ނުދެވުނަސް ވަގުތީ ހައްލެއް ހޯދައިގެން އަންނަ ޖުލައި މަހު އެކުންފުނީގެ ފްލެޓްތަކަށް މީހުން ވައްދާނެ ކަމުގެ ޔަގީންކަން އެ ކުންފުނީގެ މެނޭޖިން ޑިރެކްޓަރު އަޙްމަދު ޝަރީފް ދެއްވާފައި ވަނިކޮށެވެ.
ސްޓެލްކޯގެ އަމިއްލަ ހަރަދުގައި ކަރަންޓްގެ ކަންކަން ކުރަން އެ ކުންފުނިން ނިންމިއިރު، އެޗްޑީސީން މީގެކުރިން ބުނެފައިވަނީ، މި އަހަރުގެ ސެޕްޓެމްބަރ މަހުގެ ތެރޭގައި ސްޓެލްކޯ ޓަވަރުތަކަށް ވެސް ކަރަންޓް ދެވޭވަރުވާނެކަމަށެވެ.
