އެއްބަފާ ކޮއްކޮގެ ފިހާރައިން 180 ރުފިޔާ ވަގަށް ނެގި މީހަކު 14،000 ރުފިޔާއިން ޖޫރިމަނާ ކުރުމަށް ކްރިމިނަލް ކޯޓުން ހުކުމްކޮށްފިއެވެ.
ރ. ހުޅުދުއްފާރު، ރޯޒްވިލާ، އަހުމަދު ނަޒްމީގެ މައްޗަށް ދައުލަތުން ކޮށްފައިވަނީ ވައްކަން ކުރުމުގެ ކުށުގެ ދައުވާއެވެ.
އެގޮތުން 2020 ވަނަ އަހަރުގެ ސެޕްޓެމްބަރު މަހުގެ ފަސް ވަނަ ދުވަހުގެ މެންދުރު ފަހު 3:30 އެހައިކަށްހައިއިރު ހުޅުދުއްފާރު “ރޯސް އެޗް އެން” ފިހާރައަށް ވަދެ އެ ފިހާރައިގެ ކައުންޓަރުގެ ވަތްގަނޑުގެ ތެރެއިން 180ރ. ނެގި ކަމަށް ދައުލަތުން ވަނީ ދައުވާކޮށްފައެވެ.
މައްސަލައިގާ އިބްތިދާއީ މަރުހަލާގައި އޭނާ ވަނީ ކުށަށް އިއުތިރާފުވެފައެވެ. އެހެން ކަމުން މައްސަލަ ކުރިއަށް ގެންގޮސްފައިވަނީ އަވަސް ނިޔާގެ މައްސަލައެއްގެ ގޮތުގައެވެ. އެއާއެކު ޝަރީއަތުން ވަނީ ދިފާއުގެ އިއުތިރާފުން އޭނާގެ މައްޗަށް ވައްކަން ކުރުމުގެ ކުށުގެ ދައުވާ ސާބިތުވާ ކަމަށް ނިންމާފައެވެ.
ގާނޫނުލް އުގޫބާތުގެ ދަށުން އޭނާއަށް ކޮށްފައިވާ ކުށުގެ ދައުވާގެ އަސާސީ އަދަބަކީ ދެ މަހާއި 12 ދުވަހުގެ ޖަލު ހުކުމެކެވެ. ނަމަވެސް އިއުތިރާފުވުމަށް ފަހުގައި ނަޒްމީ ވަނީ އަދަބު ލުއި ކޮށްދިނުމަށް ޝަރީއަތުގައި އެދިފައެވެ.
އެއާއެކު ކްރިމިނަލް ކޯޓުން ވަނީ އޭނާ 14،400 ރުފިޔާއިން ޖޫރިމަނާކޮށް، ހުކުމް ކުރާ ދުވަހުން ފެށިގެން ތިން ދުވަހުގެ ތެރޭގައި ފައިސާ ދައްކާ ހަލާސްކުރުމަށް ހުކުމްކޮށްފައެވެ. ކްރިމިނަލް ކޯޓުގައި މި މައްސަލަ ބައްލަވާފައިވަނީ އެކޯޓުގެ ގާޒީ ހުސެއިން ފާއިޒް ރަޝާދެވެ.
