ގަވާއިދާ ހިލާފަށް ރާއްޖޭގެ ކަނޑުގެ ސަރަހައްދަށް ވަދެ މަސްވެރިކަން ކުރަމުން ދިޔަ ސްރީ ލަންކާގެ މަސްބޯޓެއް ހިފަހައްޓާފައިވާ ކަމަށް އެމްއެންޑީއެފުން ބުނެފި އެވެ.
އެމްއެންޑީއެފުން ބުނީ ޖުމްލަ ހަ ފަޅުވެރިން ތިބި ލަންކާގެ މަސްބޯޓު މިހާރު ކޯސްޓްގާޑު ޝިޕް ހުރަވީގެ ބެލުމުގެ ދަށުން ލ. ކައްދު އަށް ދަތުރުކުރަމުން އަންނަ ކަމަށެވެ. މި ބޯޓް ކޯސްޓްގާޓުން އަތުލައިގަތީ މ. މުލިން 76 ނޯޓިކަލް މޭލު އިރުންނެވެ.
ލަންކާގެ މި ބޯޓާ ބެހޭ މަޢުލޫމާތު ކޯސްޓްގާޑަށް ހިއްސާކުރީ “އަލަމޫ 2” ނަމަކަށް ކިޔާ ދޯންޏަކުންޏެވެ.
މީގެ ކުރިން ވެސް ރާއްޖޭގެ ކަނޑުގެ ސަރަހައްދުތަކަށް ބޭރުގެ މަސްބޯޓްތަކުން ވަދެ، ގަވައިދާ ހިލާފަށް އަމަލުކޮށްފައިވާތީ ހިފަހައްޓާފައިވެ އެވެ. އަދި މިފަދަ ހާދިސާތައް ތަކުރާރުވުން ގިނަ އެވެ.
