ގދ.ތިނަދޫގައި 25 ޓަނުގެ ދަޅުމަސް ބަންދުކުރެވޭ ކާރުޚާނާއެއް އެޅުމަށް އަމިއްލަ ކުންފުންޏަކާއި ހަވާލުކޮށްފިއެވެ. މިއީ ލާމަރުކަޒީ ނިޒާމުގެ ތެރެއިން ކައުންސިލްތަކަށް ލިބޭ ބާރާއެކު، ޕްރައިވެޓް ސެކްޓަރ ކުރިއެރުވުމަށް އެހީވުމަށް ކުރިއަށްގެންދާ މަޝްރޫޢެއް ކަމަށް ތިނަދޫ ކައުންސިލުން ވިދާޅުވެއެވެ.
މި ޕްރޮޖެކްޓް ހިންގުމުގެ ބީލަން ކާމިޔާބުކޮށް، މަސައްކަތް ހަވާލުކޮށްފައިވަނީ އަޒްރޯވާ މޯލްޑިވްސް ޕްރައިވެޓް ލިމިޓެޑާއެވެ. ކައުންސިލުން ވިދާޅުވީ މި މަސައްކަތް ހަވާލުކޮށްފައިވަނީ ޑިޒައިން އަދި ބިލްޑް އުސޫލުންކަމަށެވެ. އަދި ކާރުޚާނާ ހިންގާނީވެސް އަޒްރޯވާ މޯލްޑިވްސްއިންކަމަށެވެ.
މި ފެސިލިޓީ ޤާއިމުކުރުމަށް 230000 (ދެ ލައްކަ ތިރީސް ހާސް) އަކަފޫޓުގެ ބިމެއް ރަށުގެ އިންޑަސްޓްރިއަލް ޒޯނުންވަނީ ކަނޑައަޅާފައެވެ. މި ޕްރޮޖެކްޓްގައި ތެރޭގައި ހިމަނައިގެން 1500 ޓަނުގެ މަސް ފިނިކުރާ ނިޒާމެއްވެސް ޤާއިމުކުރާނެއެވެ.
މިކާރުޚާނާއާއެކު ރަށަށް އިތުރު 150އެއްހާ ވަޒީފާގެ ފުރުޞަތު ހުޅުވޭނެއެވެ. އަދި ސަރަޙައްދުގެ މަސްވެރިކަން ފުޅާކުރުމަށްވެސް އިތުރު ފުރުޞަތަކަށް ވާނެއެވެ. ތިނަދޫގައި މިހާރުވެސް މަސްވެރިކަމަށް ނިކުންނަ 17 އުޅަނދު އޮވެއެވެ. އަދި އިތުރު އޮޑިފަހަރުވެސް މި ސިނާޢަތަށް ނެރުމަށް ވަނީ ތައްޔާރުވެފައެވެ.
މި ޕްރޮޖެކްޓްގެ ޖުމްލަ އަގު ގާތްގަނޑަކަށް 200މިލިއަން ރުފިޔާއަށް އަރައެވެ.
