ރޭ ދަންވަރު ހަނިމާދޫން ޓްރިވެންޑްރަމަށް ދިއުމަށްޓަކައި މަލޭން ހަނިމާދޫއަށް ޖެއްސި ފުލައިޓް ފުރޮޅު ފަޅައިގެން ގޮސް ރޭގެ ދަތުރު ކެންސަލް ކޮށްފިއެވެ. ފުލައިޓް ހަނިމާދޫއަށް ޖެއްސިއިރު މާލެއިން ހަނިމާދޫއަށް ދަތުރުކުރި ފަސިންޖަރުން ބޯޓުގައި ތިއްބެވެ.
ފުލައިޓް ހަނިމާދޫއަށް ޖައްސާފައިވަނީ ރޭ 00:12 ހާއިރުއެވެ. ފުލައިޓް ޖެންސި ވަގުތު އެއްޗެއް ގޮވުމުގެ އަޑެއް އިވިފައިވާތީ ފުރަން ތިބި ދަތުރުވެރިން ތިބީ ހާސްކަންމަތީގައެވެ. ފުލައިޓް ޖެއްސިތާ 3 ވަރަކަށް މިނެޓް ތެރޭ ފުރަން އެތެރެއަށް ވަދެފައިވާ މީހުން ޓާމިނަލުން ބޭރަށް ނެރެފައި ވެއެވެ. އެއާއެކު އިތުރު ފުލައިޓެއް ހަމަޖައްސާ ކަމުގެ މައުލޫމާތު ދަތުރުވެރިނަށް މޯޑިވިއަންގެ ފަރާތުން އެރުވިއެވެ.
ނަމަވެސް ރޭ 2:40 ހާއިރު ދަތުރު ކެންސަލް ވެއްޖެކަމާއި ދަތުރު ދެންކުރާނީ މިރޭ ކަމަށް ދަތުރުވެރިނަށް އެންގުނެވެ. އަދި ދަތުރުވެރިނަށް ހަނިމާދޫގައި މަޑުކުރުމުގެ އިންތިޒާމު މޯޑިވިއަނުން ހަމަޖައްސައިދިންތަން ފެނިގެން ދިއައެވެ.
ހަނިމާދޫން ޓްރިވެންޑްރަމަށް ފުރާ ޝެޑިއުލް އަކީ 00:55 އެވެ. ޓްރިވެންޑްރަމަށް ހަނިމާދޫއަށް ފުލައިޓް އަނބުރާ އަންނަނީ 3:55 ހާއިރުއެވެ.
