ކ. އަތޮޅު ގުރައިދޫ ގެސްޓް ހައުސްއެއްގެ ތެރެއިން ކުނިވެފައިވާ އަންހެނެއްގެ ހަށިގަނޑު ފެނިއްޖެއެވެ.
ފުލުހުން ވިދާޅުވީ، އެރަށު ގެސްޓްހައުސްއެއްގެ ކޮޓަރިއަކުން ކުނިވަސް ދުވާ ކަމުގެ މައުލޫމާތު އިއްޔެ އިރުއޮއްސި 6:47ގައި ފުލުހުންނަށް ލިބުނު ކަމަށެވެ. އަދި ފުލުހުން ގޮސް ބެލިއިރު، މަރުވެފައި އޮތް އަންހެނަކު ފެނިފައިވާ ކަމަށް ވިދާޅުވިއެވެ.
މަރުވެފައި އޮއްވާ ފެނިފައިވަނީ އިނގިރޭސިވިލާތަށް ނިސްބަތްވާ އުމުރުން 57 އަހަރުގެ އަންހެން ފަތުރުވެރިއެކެވެ.
އޭނާ މަރުވެފައި އޮއްވާ ފެނިފައިވަނީ ރޭ 6:30 އެހާކަންހާއިރު އޭނާ އުޅުނު ކޮޓަރި ތެރެއިން ވަހެއް ދުވާތީ ގެސްޓް ހައުސްގެ މަސައްކަތް ކުރާ މީހުން ގޮސް ބެލި ބެލުމުންނެވެ.
މައުލޫމަތު ލިބޭ ގޮތުން ފަތުރުވެރިޔާގެ ހަށިގަނޑު ރަށު ހޮސްޕިޓަލަށް ގެންދިއުމުން އޭނާ މަރުވެފައިވާތާ އެއްދުވަސް ވަރު ވެފައިވާކަން ޑޮކްޓަރު މައުލޫމާތު ދީފައިވެއެވެ.
މި ފަތުރުވެރިޔާގެ މަރުގެ މައްސަލަ މިހާރު ފުލުހުން އަންނަނީ ތަހުގީގު ކުރަމުންނެވެ.
