ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)އިން އިންތިޒާމުކޮށްގެން ބާއްވާ ދިވެހި ޕްރިމިއާ ލީގުގެ ނޯތު ލީގުގެ އިއްޔެ ކުޅެވުނު މެޗުގައި ދިއްދޫ އިން ހަނިމާދޫ ބަލިކުރިއިރު ކުޅުދުއްފުށިން ނެއްލައިދޫ ބަލިކޮށްފިއެވެ.
އަމިއްލަ ދަނޑުގައި ދިއްދޫއިން ވަނީ ޓީމް ހަނިމާދޫ 4-3 ގެ ނަތީޖާއަކުން ބަލިކޮށްފައެވެ. މިމެޗުގައި ފުރަތަމަ ލަނޑު ޖަހާ ލީޑު ނެގީ ހަނިމާދޫއިންނެވެ. ކުޅުން ފަށައިގެން މެޗުގެ ފުރަތަމަ މިނެޓުގައި މިލަނޑު ޖަހައިދިނީ އެޓީމުގެ އަލީ އާމިރެވެ. އޭގެ ވިއްސަކަށް މިނެޓު ފަހުން ދިއްދޫގެ ހުސެއިން ސިފާހް ވަނީ ދިއްދޫއަށް ނަތީޖާ ހަމަހަމަ ކޮށްދީފައެވެ. މެޗުގައި ދިއްދޫއިން ލީޑު ނެގީ 32 ވަނަ މިނެޓުގައި ހުސެއިން ޒިމްޔާން ބޮލުން ކާމިޔާބުކޮށްދިން ހިތްގައިމު ގޯލަކުންނެވެ.
މެޗުގެ ފުރަތަމަ ހާފު ނިމެން މިނެޓަކަށް ވެފައިވަނިކޮށް ލިބުނު ޕެނަލްޓީއަކުން އަލީ އާމިރު ވަނީ ހަނިމާދޫއަށް ނަތީޖާ ހަމަހަމަކޮށްދީފަ އެވެ. މި ޕެނަލްޓީއަކީ ގޯލަށް ވަންނަން ދިޔަ ބޯޅައެއްގައި ދިއްދޫގެ ކެޕްޓަން އައްފާން އަލީ ގަސްދުގައި އަތްލުމުން ދިން ޕެނަލްޓީއެކެވެ. އެއާއެކު އެނާއަށް ރަތް ކާޑު ދައްކާ ދަނޑުން ފޮނުވާލާފައިވެއެވެ. ފުރަތަމަ ހާފު ނިމުނީ 2-2 ން އެއްވަރު ވެގެންނެވެ.
ދެވަނަ ހާފު ފަށައިގެން ވަރަށް ކުރީކޮޅުގައި ދިއްދޫއިން 2 ލަނޑުގެ ލީޑެއް ވަނީ ނަގާފައެވެ. 51 ވަނަ މިނެޓުގައި ހުސެއިން ސިފާހު ލަނޑެއް ކާމިޔާބު ކުރިއިރު 56 ވަނަ މިނެޓުގައި ދިއްދޫގެ ހަތަރު ވަނަ ލަނޑު ޖަހައިދީފައިވަނީ ތައުމީން ނޫހުއެވެ. ނަމަވެސް މެޗު ނިމުމުގެ ކުރިން 84 ވަނަ މިނެޓުގައި ހަނިމާދޫގެ އަލީ ހުސެއިން ވަނީ ލަނޑެއް ޖަހާ ހަނިމާދޫއަށް ނަތީޖާގެ ފަރަގު ކުޑަކޮށްދީފައެވެ.
ހަނިމާދޫގައި ކުޅުނު މެޗުގައި ކުޅުދުއްފުށިން ވަނީ 1-0 ނެއްލައިދޫ ބަލިކޮށްފަ އެވެ. މިމެޗުގެ ހަމައެކަނި ލަނޑު މެޗުގެ 28 ވަނަ މިނެޓުގައި ކުޅުދުއްފުށީގެ ޒިގްޒެގަށް ޖަހައިދިނީ އެޓީމުގެ ޖޯޒީ ނަމްބަރު 12 އަބްދުއްރަހީމް އަބޫބަކުރެވެ. މިމެޗުގައި ދެޓީމުގެ ފަރާތުން ވެސް މާ އެދެވޭ ކުޅުމެއް ފެނިގެންގޮސްފައިނުވާއިރު މެޗުގައި ދެޓީމަށް ވެސް ލަނޑު ޖަހާނެ ފުރުސަތުތަކެއް ވަނީ ލިބި ބޭކާރުވެފަ އެވެ.
މި މުބާރާތުގައި ބުރާސްފަތި ދުވަހު ކުޅެވޭ މެޗުގައި އިހަވަންދޫގެ ކުލަބް ޕޯލްސްޓަރއާއިން ނުކުންނާނީ ނެއްލައިދޫ ދެކޮޅަށެވެ. މިމެޗު ކުޅުމަށް ހަމަޖެހިފައިވަނީ ދިއްދޫގައެވެ. ހަނިމާދޫ ނުކުންނާނީ ކުޅުދުއްފުށީގެ ޒިގްޒެގާ ދެކޮޅަށެވެ. މިމެޗު އޮންނާނީ ހަނިމާދޫ ފުޓްބޯޅަ ދަނޑުގައެވެ.
