ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމް ކޮށްގެން ކުރިއަށް ގެންދާ ދިވެހި ލީގުގެ ކޮލިފައިން ބުރުގައި، އެންމެ އުތުރުގެ ދެ އަތޮޅުގެ މެދުގައި ކުޅޭ، އެމްޓީސީސީ ނޯތު ލީގުގައި، ހަނިމާދޫ ކައުންސިލުން ބޮޑު ހަރަދެއްކުރި ހަނިމާދޫ ޓީމަށް ނޯތު ލީގު ކުރިޔަށް ދިއުމުގެ ފުރުސަތު ގެއްލުނުއިރު އިހަވަންދޫ އިން ނެއްލައިދޫ ބަލިކޮށްފިއެވެ.
އިއްޔެ އަމިއްލަ ދަނޑުގައި ހަނިމާދޫ ވަނީ ޒިގްޒެގް އަތުން 3 – 1 ބަލިވެފައެވެ. މި މެޗުގައި ކުޅުދުއްފުށީގެ ޒިގްޒެގުން ވަނީ ތަފާތު މޮޅު ކުޅުމެއް ދައްކާފައެވެ. މި ދެ ޓީމު މުބާރާތުގެ ފުރަތަމަ މެޗުގައި ބައްދަލުކުރިއިރު މެޗުވެސް ނިމުނީ ހަމަ 3 – 1 ޒިގްޒެގް މޮޅުވެގެންނެވެ.
މިމެޗުގައި ފުރަތަމަ ލަނޑު ޖަހާ ލީޑު ނެގީ ޒިގްޒެގުންނެވެ. ޒިގްޒެގުގެ އަންވަރު އާދަމް ވަނީ މެޗުގެ 48 ވަނަ މިނެޓުގައި ލަނޑެއް ޖަހާ ޒިގްޒެގަށް ހަނިމާދޫގެ ގޯލު ހުޅުވާލަދީފައެވެ. ނަމަވެސް އޭގެ ކުޑައިރުކޮޅެއް ފަހުން 53 ވަނަ މިނެޓުގައި ހަނިމާދޫގެ އަލީ އާމިރު ނަތީޖާ ހަމަހަމަ ކުރިއެވެ. ޒިގްޒެގުގެ ދެވަނަ ލަނޑު 69 ވަނަ މިނެޓުގައި ޖަހައިދިނީ މުހައްމަދު ހުޝާމްއެވެ. މެޗުގެ ފަހު ލަނޑު 84 ވަނަ މިނެޓުގައި ކާމިޔާބުކޮށްދިނީ މުހައްމަދު ނަޝީދުއެވެ. މިއީ މުހައްމަދު ނަޝީދު ހުސްކޮށް އޮވެ ހަނިމާދޫ ގޯލަށް ފޮނުވާލި ބޯޅަ އެކެވެ.
އިއްޔެ ކުޅެވުނު ދެވަނަ މެޗުގައި އިހަވަންދޫގެ ކުލަބް ޕޯލްސްޓަރއިން ވަނީ 2 – 1 ން ނެއްލައިދޫ ބަލިކޮށްފައެވެ. މިމެޗު ކުޅުނީ ދިއްދޫ ދަނޑުގައެވެ. މިމެޗުގައި ދެޓީމުން ވެސް ރަނގަޅު ކުޅުމެއް ދެއްކިއިރު ނެއްލައިދޫއަށް މިހާރު ވަނީ މުބާރާތުގައި ކުރިއަށް ދިއުމުގެ ފުރުސަތު ބަންދުވެފައެވެ.
މެޗުގެ ކުރީކޮޅު ނެއްލައިދޫގެ އަހްމަދު އަންވަރުގެ ލަނޑަކުން އެޓީމުން ވަނީ ލީޑުނަގާފައެވެ. ނަމަވެސް ފުރަތަމަ ހާފު ނިމުމުގެ ކުރިން އިހަވަންދޫއިން ވަނީ ފަހަތުން އަރާ އެއްވަރުކޮށްފައެވެ. އެލަނޑު ޖަހާފައިވަނީ 26 ވަނަ މިނެޓުގައި މުހައްމަދު ސާނިއުއެވެ. މޮޅުވި ލަނޑު ޖަހައިދިނީ މުހައްމަދު ފާރިޝް، އެ ހާފުގެ 32 ވަނަ މިނެޓުގައެވެ.
މި މުބާރާތުގައި ހޮނިހިރު ދުވަހު ކުޅެވޭ މެޗުގައި ނުކުންނާނީ ދިއްދޫއާއި ނެއްލައިދޫއެވެ. މިމެޗު ކުޅުމަށް ހަމަޖެހިފައިވަނީ ދިއްދޫގައެވެ. އަދި ކުޅުދުއްފުއްޓާއި އިހަވަންދޫއެވެ. މިމެޗު އޮންނާނީ ހަނިމާދޫ ފުޓްބޯޅަ ދަނޑުގައެވެ.
