ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމް ކޮށްގެން ކުރިއަށް ގެންދާ ދިވެހި ލީގުގެ ކޮލިފައިން ބުރުގައި، އެންމެ އުތުރުގެ ދެ އަތޮޅުގެ މެދުގައި ކުޅޭ، އެމްޓީސީސީ ނޯތު ލީގުގައި ދިއްދޫއިން ނެއްލަދޫ ބަލިކުރިއިރު ހަނިމާދޫގައި ކުޅެން އޮތް މެޗު ކެންސަލް ކޮށްފިއެވެ.
ހަނިމާދޫ ދަނޑުގައި އިއްޔެ ޒިގްޒެގާއި އިހަވަންދޫ ކްލަބް ޕޯލްސްޓާ ބައްދަލުކުރަން އޮތް ނަމަވެސް، މޫސުން ގޯސްވެ ދަތުރުކުރަން އުނދަގޫވުމުގެ ސަބަބުން އެ މެޗު ވަނީ ފަސް ކޮށްފަ އެވެ. ދެން މިމެޗު ކުޅޭނީ 6 ވަނަ ދުވަހުއެވެ.
އިއްޔެ ހަވީރު ދިއްދޫ ފުޓުބޯޅަ ދަނޑުގައި، އެ ރަށު ބީއެކްސް ސްޕޯޓްސް ކްލަބާ ވާދަކޮށް ނެއްލަދޫ ބަލިވީ 4-2 ގެ ނަތީޖާއަކުންނެވެ. މެޗުގެ 11 ވަނަ މިނިޓުގައި ބީއެކްސް ސްޕޯޓްސް އަށް ލީޑު ނަގައިދިނީ ތައުމީން ނޫހް އެވެ. މޮޅުވާން މަސައްކަތްކުރި ޓީމް ނެއްލައިދޫ އަށް 25 ވަނަ މިނިޓުގައި ނަތީޖާ އެއްވަރު ކޮށްދިނީ އަލީ މުއާޒެވެ. ނަމަވެސް އޭގެ 11 މިނިޓު ފަހުން ހުސެއިން ޝިފާހު ވަނީ އިތުރު ލަނޑެއް ޖަހައި އަލުން ލީޑު ހޯދައިދީފަ އެވެ.
ދެވަނަ ހާފު ފެށިގެން ގާތްގާތުގައި ބީއެކްސް ސްޕޯޓްސްގެ އަހުޒަމް ރަޝީދު ވަނީ ދެ ލަނޑު ޖަހައި، ލީޑު ފުޅާކޮށްދީފަ އެވެ. އޭނާގެ ފުރަތަމަ ލަނޑު 55 ވަނަ މިނިޓުގައި ޖެހިއިރު، ދެވަނަ ލަނޑު ޖެހީ 60 ވަނަ މިނިޓުގަ އެވެ. ނެއްލައިދޫގެ ދެވަނަ ލަނޑަކީ، 79 ވަނަ މިނިޓުގައި ދިއްދޫ ބީއެކްސް ސްޕޯޓްސްގެ ރަހުމަތުﷲ އަބްދުއަރަހީމް އަތުން ބައިކޮޅަށް ވަން ލަނޑެކެވެ.
ބީއެކްސް ސްޕޯޓްސް ބާކީ އެއް މެޗު އޮއްވައި ގުރޫޕްގެ އެއްވަނައިގައި ހަ ޕޮއިންޓުގެ ލީޑެއް ނަގައިފަ އެވެ. އެ ޓީމު ކުޅުނު ހަތް މެޗުން ވަނީ 19 ޕޮއިންޓް ހޯދައިފަ އެވެ. ދެވަނައިގައި އޮތީ ހަ މެޗުން 13 ޕޮއިންޓް ހޯދައިފައިވާ ކުޅުދުއްފުށީ ޒިގްޒެގް އެވެ.
ނޯތު ލީގުގެ ޓީމުތައް ހަތަރު ގުރޫޕަކަށް ބަހާލައިގެން ކުރިއަށް ގެންދާ އިރު، ކޮންމެ ގުރޫޕެއްގެ އެއްވަނަ އަދި ދެވަނަ ޓީމު، އެއްވަނަ ޑިވިޝަނަށް ޕްރޮމޯޓް ވާނެ އެވެ. ހއ. އަދި ހދ. އަތޮޅުގެ ޓީމުތައް ހިމެނޭ ގުރޫޕް އޭ އިން ދިއްދޫ ބީއެކްސް ސްޕޯޓްސް އާއި ކުޅުދުއްފުށީ ޒިގްޒެގް ފޯ ޔޫތު ލިންކޭޖް ވަނީ ޕްރޮމޯޝަން ޔަގީން ކޮށްފަ އެވެ.
މި މުބާރާތުގައި ހޯމަ ދުވަހު ކުޅެވޭ މެޗުގައި ނުކުންނާނީ ދިއްދޫއާއި ކުޅުދުއްފުށީ ޒިގްޒެގް ފޯ ޔޫތު ލިންކޭޖްއެވެ. މިމެޗު ކުޅުމަށް ހަމަޖެހިފައިވަނީ ދިއްދޫގައެވެ. އަދި ހަނިމާދޫ ކުޅޭނީ އިހަވަންދޫއާއެވެ. މިމެޗު އޮންނާނީ ހަނިމާދޫ ފުޓްބޯޅަ ދަނޑުގައެވެ.
