ސަރުކާރުން ރާއްޖޭގެ އެކި ކަންކޮޅުތަކުގައި ތަރައްގީ ކޮށްފައިވާ ޓާފް ފުޓްބޯޅަ ދަނޑުތަކުގެ ތެރެއިން 25 ރަށެއްގެ ޓާފް ދަނޑަށް ބޭނުންވާ ޑްރެގް ބްރަޝް މެޝިން މިނިސްޓްރީ އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވަރމަންޓުން އެ ރަށްތަކާއި ހަވާލުކޮށްފިއެވެ.
މި ޑްރެގް ބްރަޝް މެޝިންތައް ރަށްތަކާއި ހަވާލުކުރުމަށް މިއަދު ވަނީ އެކުވެނި ސިންތެޓިކް ޓްރެކްގައި ކުޑަ ރަސްމީޔާތެއް ބާއްވާފައެވެ. މި ރަސްމީޔާތުގައި ޔޫތު މިނިސްޓަރ އަޙުމަދު މަހުލޫފްގެ އިތުރުން، މި ތަކެތި ލިބޭ ރަށްރަށުގެ ދާއިރާތަކުގެ މަޖިލިސް މެންބަރުން ވެސް ވަނީ ބައިވެރިވެޑައިގެންފައެވެ.
މި މެޝިންތަކަކީ ވިނަ ދަނޑުގައި ހެދޭ ވިނަތައް ކޮށުމަށާއި، ޓާފް ދަނޑުތަކުގައި ބްރަޝް އެޅުމަށް ބޭނުންކުރެވޭނެ މެޝިންތަކެއްކަމަށް ޔޫތު މިނިސްޓްރީން ބުނެއެވެ. ޔޫތް މިނިސްޓްރީން ޑްރެގް ބްރަޝް މެޝިންތައް ހަވާލުކުރި 25 ރަށަކީ، ހއ. އިހަވަންދޫ، ހއ. ދިއްދޫ، ހދ. ހަނިމާދޫ، ހދ. ނޮޅިވަރަމް، ހދ. ނެއްލައިދޫ، ށ. ފުނަދޫ، ށ. ފޯކައިދޫ، ނ. ކުޑަފަރީ، ނ. ވެލިދޫ، ނ. މަނަދޫ، ރ. ދުވާފަރު، ރ. މާކުރަތު، ޅ. އޮޅުވެލިފުށި، ކ. ގުޅި، ކ. ގުރައިދޫ، އއ. ރަސްދޫ، އދ. މާމިގިލި، ވ. ކެޔޮދޫ، ދ. ކުޑަހުވަދޫ، ތ. ތިމަރަފުށި، ގއ. ވިލިނގިލި، ގދ. ތިނަދޫ އަދި ސ. ހުޅުދޫގެ އިތުރުން ސ. ފޭދޫއެވެ.
ރާއްޖޭގެ ރަށްރަށުގައި ފެންވަރު ރަނގަޅު ފުޓުބޯޅަ ދަނޑުތައް އެޅުމަކީ ސަރުކާރުުގެ ރިޔާސީ ވައުދެކެވެ. އެގޮތުން މިހާރުވެސް ގާތްގަނޑަކަށް 40 ދަނޑުގެ މަސައްކަތް ނިންމާލާފައިވާއިރު އިތުރު 85 ދަނޑުގެ މަސައްކަތް ކުރިއަށް ދާކަމަށް ޔޫތު މިނިސްޓްރީން ބުނެއެވެ.
