ހަނިމާދޫގައި އަލްހާ ޢީދު ފާހަގަ ކުރުމަށް 75000 ރުފިޔާގެ ބަޖެއްޓެއް ހަނިމާދޫ ކައުންސިލުން ފާސްކޮށްފިއެވެ.
މިފައިސާ ހަރަދުކުރަން ނިންމީ މިއަދު ބޭއްވި ހަނިމާދޫ ކައުންސިލުގެ 4 ވަނަ ދައުރުގެ 54 ވަނަ އާއްމު ބައްދަލުވުމުގައި ބައިވެރިވި 4 މެންބަރުގެ ތެރެއިން 3 މެންބަރުގެ އަޣްލަބިއްޔަތުންނެވެ.
މިއަދުގެ ޖަލުސާގައި ވަނީ ހަނިމާދޫ ސާއްބަ އެކުވެރި ކުލަބް، އެކުވެރި ބޭންޑު އަދި ކެތިއަރާ އިން ހުށަހަޅާފައިވާ ޕްރޮޕޯސަލުތަކަށް މަސްވަރާކޮށްފައެވެ. އެ ތިން ޕްރޮޕޯސަލުގެ ޖުމުލަ އަގު އެއްލައްކަ ރުފިޔާއަށްވުރެ މައްޗަށް އަރާއިރު، ދުވަސްތަށް ފާހަގަ ކުރުމަށާއި ކުޅިވަރު ކުޅުމަށް ކައުންސިލުގެ ބަޖެޓުގައި ކަނޑައަޅާފައިވާ މިންވަރުގައި އެ އަދަދަށް ފައިސާ ވެސްނެތެވެ.
އެހެންކަމުން ކަނޑައެޅީ ހަރަދު ކުރެވެން ހުރި 75000 ރުފިޔާ މި ތިން ފަރާތުގެ މެދުގައި ހަމަހަމަޔަށް ބަހައިލައި ޢީދު ކުޅިވަރު ކުޅުމަށެވެ. އޭރުން ކޮންމެ ފަރާތަށް 25000 ރުފިޔާ ލިބިގެން ދާނެއެވެ.
މިވަރު ބޮޑު ހަރަދެއް ހަނިމާދޫ ކައުންސިލުން ކުރަން ނިންމާފައި މިވަނީ ފިނޭންސް މިނިސްޓްރީން ހަރަދު ކުޑަކުރަން އަންގާފައިވާ ދަނޑިވަޅެއްގައެވެ.
