އިންސްޓިޓިއުޓް ފޯ ގްލޯބަލް ސަކްސެސް (އައިޖީއެސް) އިން ކުރިއަށް ގެންދާ ރާއްޖޭގެ ފުރަތަމަ ސްޕޭސް މިޝަނަށް ކިޔާނެ ނަމެއް ދިނުމުގެ ފުރުސަތު އެޗްޑީސީން އާންމުންނަށް ހުޅުވާލައިފި އެވެ.
އެޗްޑީސީން ކުރި ޓްވީޓެއްގައި ބުނީ ސްޕޭސް މިޝަނަށް ދޭނެ ރީތި ނަމެއް ހޯދަމުން އަންނަ ކަމަށާ، އެ މިޝަނަށް ދޭނެ ރަނގަޅު ނަމެއް އޮތް ނަމަ، މި މަހުގެ 16 ވަނަ ދުވަހާ ހަމައަށް ފޯމު ފުރައި، އެ ހަރަކާތުގައި ބައިވެރިވުމުގެ ފުރުސަތު އޮންނާނެ ކަމަށެވެ.
އޮންލައިންކޮށް ނަން ހުށައެޅޭއިރު، ސްޕޭސް މިޝަންއަށް ނަން ހުށައެޅުމާއި އެ ހުށައަޅާ ނަމުގެ މާނައާއި އެއިން ދޭހަކޮށްދޭ ކަންކަން ހިމަނަން ވާނެއެވެ. ނަން ހުށައެޅޭނެ ޕޯޓަލް ލިންކް ހައުސިން ޑިވެލޮޕްމަންޓް ކޯޕަރޭޝަންގެ ސޯޝަލް މީޑިއާ ޕްލެޓްފޯމްތަކުގައި ވަނީ ހިމަނާފައެވެ.
އައި.ޖީ.އެސްއާއި އެޗް.ޑީ.ސީ ގުޅިގެން ކުރިއަށްގެންދާ މި ސްޕޭސް މިޝަންގެ އަމާޒަކީ ރާއްޖޭގެ ފުރަތަމަ ޕްރޮޓޮޓައިޕް ސެޓެލައިޓް ހަދާ ޓެސްޓްކުރުމެވެ. މިއީ ދުނިޔެ ހޫނުވުމާއި މޫސުމަށް އަންނަ ބަދަލުތައް ދެނެގަތުމަށް ބޭނުންވާ މައުލޫމާތު އެއްކުރަން އަޖުމަބެލުމުގެ ގޮތުން ހަދާ ސެޓެލައިޓެކެވެ. މި ސެޓެލައިޓް ހަދައި، ޓެސްޓުކޮށް ލޯންޗު ކުރަން ހަމަޖެހިފައިވަނީ ދިވެހި ޒުވާން ޓީމަކުންނެވެ. 7 މެންބަރުންގެ ޓީމުގައި މުޅިންވެސް ހިމެނެނީ 30 އަހަރުން ދަށުގެ މީހުންނެވެ. އެއީ 2 އަންހެނުންނާ 4 ފިރިހެނުންނެވެ.
މިއީ އެމެރިކާގެ ކޭ.އެސް.އެފް ސްޕޭސް ފައުންޑޭޝަންގެ ފަންނީ އެހީތެރިކަމާއެކު އައިޖީއެސްއިން ކުރިއަށްގެންދާ ޕްރޮޖެކްޓެކެވެ.
ކޭ.އެސް.އެފް ސްޕޭސް ފައުންޑޭޝަނަކީ ސްޕޭސް ޢިލްމު ފުޅާކޮށް، ސެޓެލައިޓް ލޯންޗުކޮށްދިނުމުގައި އެހީތެރިކަން ފޯރުކޮށްދޭ ޖަމިއްޔާއެކެވެ. އެ ޖަމިއްޔާގައި އެމެރިކާގެ ޖައްވީ އިދާރާ ނާސާއާއި ޔޫރަޕިއަން ސްޕޭސް އެޖެންސީ (އީސާ) އާއި މަޝްހޫރު ސްޕޭސް ކުންފުނި ސްޕޭސް އެކްސްގެ ސައިންސްވެރިންނާއި ތަޖުރިބާކާރުން އަންނަނީ ހަރަކާތްތެރިވަމުންނެވެ.
