ސްރީ ލަންކާގެ ރައީސަކު ހޮވުމަށް މިއަދު އެ ގައުމުގެ ގާނޫނު ހަދާ މަޖިލީހުގައި ނެގި ވޯޓު އެ ގައުމުގެ ބޮޑުވަޒީރު ރަނިލް ވިކްރަމަސިންހެ ކާމިޔާބުކުރައްވައިފި އެވެ.
ކުރީގެ ރައީސް ގޮތަބަޔަ ރާޖަޕަކްސަ އިސްތިއުފާ ދެއްވުމުން ވަގުތީ ރައީސްގެ މަގާމް ފުރުއްވަމުން އައި ރަނިލް މަގާމް ކާމިޔާބުކުރެއްވީ 134 ވޯޓުންނެވެ.
އޭނާއާ ވާދަކުރެއްވި އިިދިކޮޅު ކެންޑިޑޭޓް ޑަލަސް އައްލަހަޕެރުމަ އަށް 82 ވޯޓު ލިބިވަޑައިގެންނެވިއިރު އަނޫރާ ކޭ ޑިސަނަޔަކަ އަށް ލިބިވަޑައިގަތީ އެންމެ ތިން ވޯޓެވެ.
ލަންކާގެ ބޮޑުވަޒީރަކަށް މޭ މަހު ރަނިލް އައްޔަންކުރީ، އޭރުގެ ބޮޑުވަޒީރު މަހިންދަ ރާޖަޕަކްސާ އިސްތިއުފާ ދެއްވުމުންނެވެ. ރަނިލް އެ މަގާމަށް ގެންނަވަން އޭރުގެ ރައީސް ގޮތަބަޔަ ނިންމެވީ އޭނާ އަކީ ހުޅަނގާ ގާތް ގުޅުން އޮންނަ އަދި ސިޔާސީ ގޮތުން ތަޖުރިބާކާރު ބޭފުޅަކަށް ވުމުންނެވެ.
އޭނާ އަށް ފުރަތަމަ އާއްމުންގެ ތާއީދު އޮތް ނަމަވެސް، މަގާމަށް ވަޑައިގެން ރާޖަޕަކްސަ އާއިލާ އަށް އެހީތެރިވެވަޑައިގަންނަވާތީ އާއްމުން ހިތްހަމަނުޖެހުނެވެ. ދާދި ފަހުން އާއްމުންގެ ޕްރެޝަރު ބޮޑުވެ ގޮތަބަޔަ އިސްތިއުފާ ދެއްވިއިރު ރަނިލް ވެސް އިސްތިއުފާ ދެއްވަން އާއްމުން ގޮވާލި އެވެ.
އެކަމަކު ރަނިލް ވަނީ އޭނާ މަގާމާ ހަވާލުވެވަޑައިގެން ކުރިއެރުންތައް ހޯއްދެވި ކަމަށް ވިދާޅުވެ ރައީސްގެ މަގާމަށް ކުރިމަތިލައްވައިފަ އެވެ. އާއްމުންގެ ނުރުހުނަސް ރަނިލް އަށް ބޮޑަށް އޭނާ އަށް މަގާމް ލިބިވަޑައިގަތީ މަހިންދަ ރާޖަޕަކްސަގެ ސްރީ ލަންކާ ޕީޕަލްސް ފްރަންޓްގެ 100 ގޮނޑިއާ އެކު އެވެ.
އިދިކޮޅު މައި ޕާޓީ ކަމަށްވާ އެސްޖޭބީ އަށް ލިބިފައިވަނީ 54 ގޮނޑި އެވެ. މިއަދު ރަނިލްއާ ވާދަކުރެއްވި ޑަލަސް އަށް އެ ޕާޓީން ތާއީދުކުރި އެވެ. އޭނާ ހޮވުނު ނަމަ ބޮޑުވަޒީރަކަށް ގެންނަވާނީ އެސްބީޖީގެ ލީޑަރު ސަޖިތު ޕްރަމަދޭސަ އެވެ.
އާ މަގާމާ އެކު ރަނިލް އަށް އޮތް ޒިންމާ ބޮޑެވެ. ދަރަނި ނުދެއްކި ބަނގުރޫޓުވެފައިވާ ގައުމު އޮތީ އިންސާނީ ކާރިސާއެއްގެ ތުންފަތްމަތީގަ އެވެ. ގައުމުގައި ތެލެއް ނެތެވެ. ކާއެއްޗެހި ވެސް އަންނަނީ ހުސްވަމުންނެވެ. ބޭރު ފައިސާގެ ރިޒާވެއް ނެތެވެ. ހާލަތުން އަރައިގަންނަން އެކަށޭނެ ޕްލޭނެއް ނެތުމުން މާލީ އިދާރާކުންނާއި ހުޅަނގުގެ ގައުމުތަކުން އެ ގައުމަށް އެހީތެރިކަން ފޯރުކޮށްދޭން ފަސްޖެހެ އެވެ.
