ބޭންކް އޮފް މޯލްޑިވްސްއިން ހިންގާ ‘ބީއެމްއެލް ކޮމިއުނިޓީ ފަންޑު’ގެ ދަށުން ތ.ކިނބިދޫ އަދި ނ. ލަންދޫގައި ކުރިޔަށްދިޔަ ދެ ޕްރޮޖެކްޓް ކާމިޔާބު ކަމާއެކީ ނިންމާލައިފިއެވެ.
ބެންކް އޮފް މޯލްޑިވްސްއިން ބުނީ، މި ޕްރޮޖެކްޓްގެ ދަށުން ތ. ކިނބިދޫގައި ޕިކްނިކް ސަރަހައްދެއް ތަރައްގީކޮށްފައިވާ ކަމަށެވެ. އަދި ރަށުގެ ރައްޔިތުންނާއި ކިނބިދޫ ސްކޫލު ކުދިންނަށް ބޭނުން ކުރެވޭނެހެން މި ސަރަހައްދުގައި ހަޓް، ޖޯލި، ބެންޗު އަދި އައުޓްޑޯ ޝަވަރެއް ބަހައްޓާފައިވާ ކަމަށެވެ.
މި ޕްރޮޖެކްޓާ ގުޅޭގޮތުން އައިޝަތު ސަމާ ވިދާޅުވީ، އެރަށުގައި މޫދަށް އެރުމަށް ހާއްސަ ބީޗު ސަރަހައްދެއް ނެތުމުން ރަށުގެ ރައްޔިތުން ޕިކްނިކް ގޮސް އުޅުމަށާއި، މުނިފޫހިފިލުވުމުގެ ހަރަކާތްތަކަށް އާންމު ގޮތެއްގައި ކައިރި ރަށްރަށަށް ދަތުރުކުރަން މަޖުބޫރުވާ ކަމަށެވެ. އަދި މި ސަރަހައްދު ތަރައްގީވުމާއެކު، މިއީ އެންމެނަށްވެސް ބޭނުންކުރެވޭނެ ތަނަކަށް ވެގެންދާނެ ކަމަށެވެ.
ކޮމިއުނިޓީ ފަންޑުގެ އެހީގައި ނ.ލަންދޫގައި ތަރައްޤީކޮށްފައިވަނީ، ބާބަކިއު ހެދުމަށް ހާއްސަ ސަރަހައްދެކެވެ. މި ސަރަހައްދުގައި ވަނީ، ބެންޗު، އުނދޯލި، އަދި ހަޓު ބަހައްޓާފައެވެ. މި ބާބަކިއު ސަރަހައްދުގައި މިނީ ލައިބްރަރީއަކާއެކު ކެންޓީނަކާއި، ތަކެތި ރައްކާކުރުމަށް ސްޓޯރެއްވެސް ވަނީ ގާއިމްކޮށްފައެވެ.
ކޮމިއުނިޓީ ފަންޑު ޕްރޮޕޯސަލް ކާމިޔާބު ކުރި އަހުމަދު ރަޝީދު ވިދާޅުވީ، މި ބާބަކިއު ސަރަހައްދު ހެދުމުގެ އެންމު ބޮޑު މަގުސަދަކީ ހިތްހަމަޖެހުމާއި އުފަލުގެ ތެރެއިން އެކުވެރި ބަދަހި އާއިލާތަކެއް އުފައްދާ އެއްބައިވަންތަ މުޖުތަމައުއެއް ބިނާކުރުން ކަމަށެވެ.
ބީ.އެމް.އެލްގެ ކޮމިއުނިޓީ ފަންޑަކީ، ހިލޭ ސާބަހަށް ކުރާ މަސައްކަތްތަކަށާއި، ތަޢުލީމާއި، ކުޅިވަރު ހަރަކާތްތަކުގެ އިތުރުން ތިމާވެށި ހިމާޔަތްކުރުން ފަދަ ކަންކަމަށް އަމާޒުކޮށްގެން ހުށަހެޅޭ ޕްރޮޕޯސަލްތަކެކެވެ. މިހާރު ބޭންކުން ދަނީ، މިއަހަރުގެ ދެވަނަ ކުއާޓަރއަށް ހުށަހެޅުނު ޕްރޮޕޯސަލްތައް އިވެލުއޭޓް ކުރުމުގެ މަސައްކަތްކުރަމުންނެވެ.
