ރ. އަލިފުށީ ބިން ހިއްކުމާއި އެއާޕޯޓް ތަރައްގީކުރުމުގެ މަޝްރޫއުގެ ދަށުން ކަޓާ ސަކްޝަން ޑްރެޖަރު ޕްރޮޖެކްޓް ސައިޓަށް ގެންގޮސްފި އެވެ.
އަލިފުށީ ބިން ހިއްކުމާއި އެއާޕޯޓް ހެދުމުގެ މަޝްރޫއު ހަވާލުކޮށްފައިވަނީ އެމްޓީސީސީއާ އެވެ. އެ ދެ މަޝްރޫއު ޑިޒައިން އެންޑް ބިލްޑު އުސޫލުން އެ ކުންފުންޏާ ހަވާލުކުރީ ސެޕްޓެމްބަރު 1، 2021ގަ އެވެ.
މަޝްރޫއުގެ އަމަލީ މަސައްކަތް ފެށުމަށް އޭޕްރިލް މަހުގެ މެދު ތެރޭގައި ޕްރޮޖެކްޓް ސައިޓް މޮބިލައިޒްކުރި އިރު، އަމަލީ މަސައްކަތް ފެށީ މިދިޔަ މެއި މަހުގެ 14 ވަނަ ދުވަހު އެވެ.
ޖުމުލަ 451.61 މިލިއަން ރުފިޔާގެ މި މަޝްރޫއުއަކީ އަގުގެ ގޮތުންނާއި މަޝްރޫއުގެ ދަށުން ކުރަންޖެހޭ މަސައްކަތުގެ ގޮތުން އެމްޓީސީސީގެ 41 އަހަރުގެ ދިގު ތާރީހުގައި ސަރުކާރުން އެ ކުންފުންޏާއި ހަވާލުކުރި އެންމެ ބޮޑު މަޝްރޫއެވެ.
އެ މަޝްރޫއުގެ ފަހުގެ މައުލޫމާތު ދެއްވަމުން އެމްޓީސީސީން މިއަދު ބުނީ، ކަޓާ ސަކްޝަން ޑްރެޖަރު، ޖައްރާފާ 4 އިއްޔެ ޕްރޮޖެކްޓް ސައިޓަށް މޯބިލައިޒް ކޮށްފައިވާ ކަމަށެވެ.
މި މަޝްރޫއުގެ ދަށުން އަލިފުށީގެ 50.5 ހެކްޓަރުގެ ބިން ހިއްކާނެ އެވެ. އެ ބިމުގެ ތެރެއިން 10 ހެކްޓަރުގެ ބިމަކީ ރަށުގެ ތަރައްގީއާއި ގެދޮރުވެރިކަމުގެ ބޭނުމަށް ހާއްސަކޮށްގެން ހިއްކާ ބިމެވެ.
ބާކީ 40.5 ހެކްޓަރުގެ ބިމަކީ އެއާޕޯޓް އެޅުމަށް ހިއްކާ ބިމެވެ. ހިއްކާ ބިމުގެ ގޮނޑުދޮށް ހިމާޔަތްކުރުމުގެ ގޮތުން 2871 މީޓަރުގެ ރިވެޓްމަންޓަކާއި 480 މީޓަރުގެ ގްރޮއިންއެއްވެސް ގާއިމުކުރާނެ އެވެ.
އެއާޕޯޓް މަޝްރޫއުގެ ދަށުން 1200 މީޓަރުގެ ރަންވޭއަކާއި ޓެކްސީވޭ، އޭޕްރަން އަދި ސާވިސް ރޯޑު ހެދުމާއި ޓާމިނަލް ބިލްޑިން އަކާއި ފަޔާ ބިލްޑިން އެއް އެޅުމާއި އަލިފާން ނިއްވާ އާލާތްތައް ބެހެއްޓުމާއި 655 މީޓަރުގެ ސެކިއުރިޓީ ފެންސެއް ޖެހުމުގެ މަސައްކަތް ވެސް ކުރާނެ އެވެ.
