މުސްލިމްއަޅަކަށް ދުނިޔެމަތީ މާތް ﷲ ދެއްވާނޭ އެންމެ މަތިވެރި އެއް ނިޢުމަތަކީ އެ އިލާހުގެ ގެކޮޅަށް އެ މީހަކު ގެންނަވައި، ޙައްޖުގެ މަތިވެރި އަޅުކަން އަދާކުރުމުގެ މަގު އެ މީހަކަށް ތަނަވަސްކޮށްދެއްވުމެވެ. މަބްރޫރު ޙައްޖެއް ދެއްވުމެވެ. މާތް ނަބިއްޔާ صَلَّى اللهُ عَلَيْهِ وَسَلَّمَގެ މަތިވެރި ޙަދީޘްގައި ވަނީ، މަބްރޫރު ޙައްޖެއްގެ ސަވާބަކީ ސުވަރުގެ ކަމެވެ. އަދި، ފާފައާއި އުނިކަންކަމުން އެއްކިބާވެފައިވާ ޙައްޖެއް އަދާކުރާ މީހަކީ އޭނާގެ މަންމަގެ ބަނޑުން އުފަންވިއިރު އޮތް ފަދައިން ފާފަތަކުން ސާފުޠާހިރުވެފައިވާ މީހެއް ކަމެވެ.
މަބްރޫރު ޙައްޖެއްގެ ނިޢުމަތުގެ މަތިވެރިކަމަކީ މިއީއެވެ. އެ މީހެއްގެ ހުރިހާ ފާފަތަކެއް މާތް ﷲ ފުއްސަވައިދެއްވުމެވެ. ފާފައެއް ނެތް އައު ޙަޔާތެއް ފަށައިގަތުމުގެ ފުރުޞަތު އަނެއްކާ ވެސް އޭނާއަށް ލިބިގެންދާތީއެވެ. ޙަޔާތުގެ ދަތުރުނާމާ އައު ޞަފްޙާއަކުން ފަށައިގަތުމުގެ ފުރުޞަތެވެ.
މިފަދަ މަތިވެރި ނިޢުމަތެއް ލިބިއްޖެ މީހަކު ވިސްނާންވީ، މި ނިޢުމަތަށް ރައްކައުތެރިވުމަށެވެ. ޙަޔާތުގެ ބާކީ އޮތް ބައި ހެޔޮގޮތުގައި ހޭދަކުރުމަށެވެ. ކުރީން ކުރެވިފައިވާ ފާފަތަކާއި ޙައްޖާ ޖެހޭންދެން ވެސް ކުރަމުން އައި ފާފައެއް ވާ ނަމަ، އެ ފާފަތަކުން ތެދުވެރި ތައުބާއަކުން ތައުބާވެ، އެ ފާފަތަކަށް ދެން ދުވަހަކު ވެސް އަރައިނުގަންނާން ޢަޒުމު ކަނޑައެޅުމެވެ. ޢަރަފާތުގެ މާތް ބިމުގައި ވި ތައުބާއާއި އައުކުރި ޢަޒުމް އިތުރަށް ވަރުގަދަކޮށް އައު ކުރުމެވެ.
އެހެނަސް، ހިތާމައަކީ އަޅުގަނޑުމެންގެ ތެރެއިން ބައެއް މީހުންނީ ފާފަތަކުން ތައުބާވިއެއް ކަމަކު ކުރީން ކުރަމުން އައި ފާފަތަކުން އެއްކިބާވާ ބައެއް ނޫނެވެ. އެފަދަ މީހުން ޙައްޖުން އެނބުރި އައިސް، ހަމަ އެ ފާފަތަކަށް އެއްވެސް ޖެހިލުމެއް ނެތި އަރައިގަންނަ މަންޒަރު ފެންނަނީ މަދެއްކޮށެއް ނޫނެވެ. ތެދުވެރި ތައުބާއަކުން ތައުބާވުމަކީ، އިސްތިޣްފާރުކޮށް އެ ފާފައެއް ފުއްސަވައިދެއްވުމަށް ހަމައެކަނި އެދުމެއް ނޫނެވެ. އެއީ ތައުބާވުމުގެ މުހިންމު ބައެކެވެ. ތައުބާވުމުގެ މުހިންމު އަނެއް ބަޔަކީ އެ ކުރަމުން އައި ފާފަތަކުން އެއްކިބާވުމެވެ. އެކަމުން ދުރަށް ދިޔުމެވެ. އެ ފާފަތަކަށް އަރައިނުގަންނާން ޢަޒުމު ކަނޑައެޅުމެވެ. މީހެއްގެ ޙައްޤެއް އެކުލެވޭ ފާފައެއް ނަމަ، އެ ޙައްޤެއް އަދާކުރުމެވެ. ހިތްޙަލާލު ހޯދުމެވެ.
ދަންނާން ޖެހޭ ޙަޤީޤަތަކީ، އިންސާނުންނަށް ވީތީ ފާފަކުރެވޭނެއެވެ. ފާފައަކަށް އަރައިގަނެވިދާނެއެވެ. ޣަފްލަތުގެ ވަގުތާއި ބަލިކަށިވާ ވަގުތަކީ އިންސާނީ ޠަބީޢަތެވެ. އެއީ ތެދުވެރި ތައުބާއަކުން ތައުބާވެފައިވާ މީހާއަށް ވެސް ދިމާވެދާނޭ ކަމެކެވެ. ނަމަވެސް އެއީ ފާފަކުރާން އޮތް ޢުޒުރެއް ނޫނެވެ. އަދި އެއީ އެ ފާފަތަކުގެ މަތީގައި ދެމިހުރުމަށް އޮތް ބަހަނާއެއް ވެސް ނޫނެވެ. ޣަފްލަތުގައި ފާފައެއް ކުރެވިއްޖެއްޔާ އެ މީހަކަށް އޮތީ ހޭވެރިވުމާ އެކު އެ ފާފައަކުން ތައުބާވުމެވެ. ގިނަގިނައިން ތައުބާވުމެވެ. މާތް ﷲ ލޯބިވެވޮޑިގެންވަނީ ތައުބާވާ އަޅުން ދެކެއެވެ.
މާތް ﷲ ފަރުޟުކުރައްވައިފައިވާ މަތިވެރި އަޅުކަންތަކުގެ މައިގަނޑު އެއް މަޤްޞަދަކީ އެ އަޅުކަންތަކުން މުސްލިމް އަޅާއަށް ތަޤްވާވެރިކަން ހާސިލުވުމެވެ. ޙަޔާތަށް ހެޔޮ ބަދަލުތަކެއް އައުމެވެ. ފާފައިން ދުރުވުމެވެ. އާޚިރަތް މަތިން ގިނަގިނައިން ހަނދާންކުރުމެވެ. ދުނިޔެވީ ދަޅަތަކުގެ އަޅަކަށް ވުމުގެ ބަދަލުގައި، ހަމައެކަނި މާތް ﷲގެ އަޅެއްގެ ގޮތުގައި ދުނިޔޭގެ ޙަޔާތް ވެއަތުކުރުމެވެ.
ޙައްޖުގެ މައިގަނޑު މަޤްޞަދަކީ ވެސް އެއީއެވެ. މާތް ﷲގެ ވަޙްދާނިއްޔަތު ޤަބޫލުކުރާ ފުރިހަމަ މުވައްޙިދެއްގެ ގޮތުގައި ޙަޔާތުގެ ބާކީބައި ހޭދަކުރުމެވެ. އަދި އެ އިލާހުގެ ދިންނެވުމާއި ފުއްސެވުން ލިބި ސުވަރުގޭގެ އަހުލުވެރީންގެ ތެރޭގައި އެ މީހަކު ހިމެނިގެން ދިޔުމެވެ.
