ފެނަކަ ކޯޕަރޭޝަނާއި މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީ ގުޅިގެން ރާއްޖޭގައި ފަށާފައިވާ ހޯމް ސޯލާ ޕްރޮގުރާމާ ގުޅޭ މައުލުމާތު ސެޝަނެއް ހަނިމާދޫގައި މިރޭ ކުރިޔަށް ގެންގޮސްފިއެވެ.
އެގޮތުން، އެ ޕްރޮގުރާމުގެ ސަބަބުން އިޔާދަކުރުވަނިވި ހަކަތަ ބޭނުންކޮށްގެން ތިމާވެއްޓާ ރަހުމަތްތެރި، ޚަރަދުކުޑަ ގޮތަކަށް ކަރަންޓު ބޭނުންކުރެވޭނެކަމަށް ފެނަކައިން ބުންޏެވެ.
ހޯމް ސޯލާއަށް ބަދަލުކުރުމަށް ކުރެވޭ ކުޑަ ޚަރަދުގެ ބަދަލާއި ފައިދާ 97% އާއި ހަމައަށް ސީދާ ގޮތުގައި ރައްޔިތުމީހާއަށް ލިބިގެންދާނެވެ. މާނައަކީ މަހުންމަހަށް އަންނަ ކަރަންޓު ބިލް 97% އާއި ހަމައަށް ކުޑަވެގެންދާނެއެވެ. 2000 ރުފިޔާ މަހު ކަރަންޓު ބިލައްއަރާ ގޭގޭގައި 60 ރުފިޔާއާއި ހަމައަށް ކުޑާވެގެން ދާނެއެވެ. ހޯމް ސޯލާ ސިސްޓަމް ތަކަކީ ގޭފުރާޅުގައި ހަރުކުރެވޭ ފެހި ޕަވާ ޕްލާންޓެކެވެ. މެއިންޓެނަންސް ޚަރަދު ކުޑަ، އިރުގެއަލިން ގެ ދިއްލާލަދޭ އަދި ފިނި ކޮއްލަދޭ ޕަވާ ޕްލާންޓެއް ކަމަށް ފެނަކައިން ބުނެއެވެ.
ފެނަކަ ހޯމް ސޯލާ ޕްރޮގުރާމުގެ ދަށުން ދޭ ޚިދުމަތްތަކުގެ ތެރޭގައި، ރައްޔިތުންނަށް ޚިދުމަތް ފޯރުކޮށްދިނުމާއި މައުލޫމާތު ސާފުކޮށްދީ، ކޮންމެ ގޭބީސީއަކަށް ހެޔޮއަގުގައި ފައިސާ ދެއްކޭނެ ނިޒާމެއް ފަހިކޮށްދެއެވެ.
މީގެ އިތުރުން އެ ޕްރޮގުރާމުގައި ބައިވެރިވުމަށް ފޯމު ފުރައި، ދެ ފަރާތުން ސޮއިކުރުމަށް ފަހު ފެނަކައިގެ ޓެކްނިކަލް ޓީމުން ކަސްޓަމަރުގެ ގޭގެއަށް ޒިޔަރާތްކޮށް އެސެސްމެންޓެއް ހަދާނެއެވެ. އަދި އެ އެސެސްމަންޓްގެ މައްޗަށް ބަލާ، އެ ގެއެއްގައި ސޯލާ ޕެނަލްތައް ހަރުކުރުމުގެ ޚިދުމަތް ފޯރުކޮށްދޭނެކަމަށް ފެނަކައިން ބުނެއެވެ.
ފުރާޅުގައި ސޯލާ ހަރުކުރުމާއިއެކު ފެނަކައިން ދޭ ޚިދުމަތް ނިމުނީކީ ނޫން ކަމަށާއި ފެނަކައިގެ ޓެކްނިކަލް ޓީމް ތިބޭނީ ދިމާވެދާނެ މައްސަލައެއް ހައްލު ކުރުމަށް އަބަދުވެސް ތައްޔާރުގައި ކަމަށް ފެނަކައިން ބުނެއެވެ.
ހޯމް ސޯލަރ ސިސްޓަމްގެ އަގުތަކާއި ޕްލޭންތައް
- ފެހިހަކަތަ 2ކިލޯވޯޓް : ވަގުތުން ފައިސާ ދައްކާނަމަ 35،000ރ އަރާއިރު 2 އަހަރު، 3 އަހަރު، އަދި 5 އަހަރަށް ބަހައިލައިގެންވެސް މި ޕްލޭން ނެގެއެވެ. އެގޮތުން ދެއަހަރަށް ބަހައިލާނަމަ އެޑްވާންސް ދައްކަން ނުޖެހޭއިރު މަހަކު ދައްކަންޖެހެނީ 1647.57ރުފިޔާއެވެ. 3 އަހަރަށް ބަހައިލާނަމަ އެޑްވާސް 2000ރުފިޔާ ދައްކަންޖެހެއެވެ. މަހަކު 1096.07 ރުފިޔާ ދައްކަން ޖެހެއެވެ. 3 އަހަރަން ބަހައިލާނަމަ އެޑްވާންސް 3500ރުފިޔާ ދައްކާއިރު މަހަކަށް 700.70 ރުފިޔާ ދައްކަން ޖެހެއެވެ.
- ފެހިހަކަތަ 3 ކިލޯވޯޓް : ވަގުތުން ފައިސާ ދައްކާނަމަ 55،000ރ އަރާއިރު 2 އަހަރު، 3 އަހަރު، އަދި 5 އަހަރަށް ބަހައިލައިގެންވެސް މި ޕްލޭން ނެގެއެވެ. އެގޮތުން ދެއަހަރަށް ބަހައިލާނަމަ އެޑްވާންސް 3000ރުފިޔާ އަދި މަހަކު 2447.82 ރުފިޔާ ދައްކަން ޖެހެއެވެ. . 3 އަހަރަށް ބަހައިލާނަމަ އެޑްވާންސް 5000ރުފިޔާ ދައްކަންޖެހެއެވެ. މަހަކު 1660.72 ރުފިޔާ ދައްކަން ޖެހެއެވެ. 3 އަހަރަން ބަހައިލާނަމަ އެޑްވާންސް 7500ރުފިޔާ ދައްކާއިރު މަހަކަށް 1056.61 ރުފިޔާ ދައްކަން ޖެހެއެވެ.
އެޕްލިކޭސަން ފޯމް އެރަށެއްގެ ފެނަކަ އޮފީހުން ލިބޭއިރު ފޯމާއެކު ހުށަހަޅަންޖެހޭ ތަކެތީގެ ތެރޭގައި އައިޑީ ކާރޑް ކޮޕީ، ގޯތި ނުވަތަ އިމާރާތުގެ ރަޖިސްޓުރީގެ ކޮޕީ، ފުރާޅުގެ މިންތައް (ހުރަހާއި ދިގު) އަދި ފާއިތުވެދިޔަ 12 މަސްދުވަހުގެ ބިލްކުރެވިފައިވާ ޔުނިޓްތަކާއި ޔުނިޓްގެ އެވްރެޖް ހުށައަޅާން ޖެހެއެވެ. 12 މަސްދުވަހުގެ ޔުނިޓްތަކާއި ޔުނިޓްގެ އެވްރެޖް އެރަށެއްގެ ފެނަކަ ބްރާންޗުން ނަގައިދޭނެއެވެ.
