އެމްޓީސީސީ ނޯތު ލީގު، ދެވަނަ ޑިވިޝަންގެ ގްރޫޕް ސީގެ އިއްޔެގެ މެޗުތަކުން ނ. ކެނދިކުޅުދޫއާއި ނ. މާޅެންދޫ މޮޅުވެއްޖެ އެވެ.
ކެނދިކުޅުދޫ އަމިއްލަ ދަނޑުގައި ކުޅެ 3-0 ނަތީޖާއަކުން ފަސޭހަކަމާއެކު ހޮޅުދޫގެ މައްޗަށް ކުރިހޯދަފައެވެ.
މެޗުގެ 5 ވަނަ މިނެޓުގައި ލިބުނު ޕެނަލްޓީއަކުން މެޗުގެ ކުރީކޮޅު ކެނދިކުޅުދޫއިން ލީޑު ނެގި އެވެ. މިޕެނަލްޓީ އެޓީމަށް ކާމިޔާބުކޮށްދިނީ ޖޯޒީ ނަމްބަރު 7 އަލީ ބުސްރީ އެވެ. މެޗުގެ ފުރަތަމަ ހާފު ނިމުނީ 1 – 0 ން އެޓީމު ކުރީގައި އޮވެގެންނެވެ. ދެވަނަ ހާފު ފަށައިގެން 57 ވަނަ މިނެޓުގައި އަނެއްކާވެސް ކެނދިކުޅުދޫން ވަނީ ލަނޑެއް ޖަހާފަ އެވެ. މިލަނޑު ޖެހީ އައްޒާމް އަބްދުﷲ އެވެ. އަދި މެޗު ނިމެން 9 މިނެޓަށް ވެފައި ވަނިކޮށް ކެނދިކުޅުދޫގެ 3 ވަނަ ލަނޑު ޖަހައިދިނީ އަލީ ސަމާލް އެވެ.
އިއްޔެ ކުޅެވުނު ދެވަނަ މެޗުގައި މާޅެންދޫން ވަނީ 2 – 1 ކުޑަފަރީ ޓީމު ބަލިކޮށްފަ އެވެ. މެޗުގައި ފުރަތަމަ ލީޑު ނެގީ ވެސް މާޅެންދޫ ޓީމުންނެވެ. 30 ވަނަ މިނެޓުގައި އިބްރާހިމް ޒަޔާންގެ ލަނޑުން ލީޑު ނެގިނަމަވެސް ފުރަތަމަ ހާފު ނިމުމުގެ ކުރިން ކުޑަފަރިން ނަތީޖާ އެއްވަރުކުރި އެވެ. މިއީ ފުރަތަމަ ހާފުގެ ފަހުވަގުތު ކޮޅުގައި އަލީ ސިޔާޒް ކާމިޔާބުކޮށްދިން ލަނޑެކެވެ. ވާދަވެރި ކުޅުމެއް ފެނިގެންދިޔަ މިމެޗުން މާޅެންދޫ މޮޅުވި ލަނޑު 55 ވަނަ މިނެޓުގައި ޖަހައިދިނީ އަބްދުﷲ ޝަފީން އެވެ.
މި މުބާރާތުގައި ކެނދިކުޅުދޫން މާދަމާގެ މެޗުގައި ނުކުންނާނީ އަމިއްލަ ދަނޑުގައި ކުޑަފަރިއާ ދެކޮޅަށެވެ. އަދި ހޮޅުދޫން އަމިއްލަ ދަނޑުގައި މާޅެންދޫއާ ދެކޮޅަށް ނުކުންނާނެ އެވެ. ދެމެޗު ވެސް ފަށާނީ ހަވީރު 4 ޖަހާއިރު އެވެ.
