އެމްޑީޕީގެ ރައީސް، އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު މާދަމާ ނޫސްވެރިންނާ ބައްދަލުކުރަށްވަން ނިންމަވައިފައިފިއެވެ.
އެމްޑީޕީން މިއަދު ބުނީ އެ ޕާޓީގެ ރައީސް، ނަޝީދު މާދަމާ ހެނދުނު 11 ޖަހާއިރު، ޕާޓީގެ އޮފީހުގައި ނޫސްވެރިންނާ ބައްދަލުކުރައްވާ ގޮތަށް ހަމަޖެހިފައިވާ ކަމަށެވެ.
އަމިއްލަ އަދި ރަސްމީ ދަތުރުފުޅެއްގައި ރާއްޖެއިން ބޭރުގައި ހުންނެވުމަށް ފަހު ރައީސް ނަޝީދު ރާއްޖެ ވަޑައިގަތީ މިއަދުގެ ހެނދުނުގެ ވަގުތެއްގައެވެ.
ރައީސް ނަޝީދު ނޫސްވެރިންނާ ބައްދަލުކުރައްވަން ހަމަޖައްސަވާފައިވާއިރު އެ މަނިކުފާނާއި ރައީސް އިބްރާހިމް މުހައްމަދު ސޯލިހުގެ ގުޅުން ވަނީ ވަރަށް ބޮޑަށް ގޯސްވެފައެވެ.
އެއްޖިންސުން ގުޅުން ހިންގި މައްސަލައިގެ ތުހުމަތަށް ރައީސް ނަޝީދުގެ ކޮއްކޮ ނާޒިމް ސައްތާރު ބަންދުކުރުމުން ނަޝީދު ވަނީ ރައީސް ސާލިޙަށް ފާޑުވިދާޅުވެފައެވެ. އަދި ރައީސް ޞާލިހުގެ ބަރަހާނާ ފޮޓޯތަކެއް ހުރި ކަމަށް ވިދާޅުވެ ރައީސް ނަޝީދު ވަނީ ރައީސް ސާލިޙަށް އިންޒާރު ތަކެއްވެސް ދެއްވާފައެެވެ.
އެހެން ނަމަވެސް ރައީސްގެ އެފަދަ ފޮޓޯތަކެއް ނުހުންނާނެ ކަަމަށް ވިދާޅުވެ ރައީސް އޮފީހުން ވަނީ އެކަން ދޮގުކޮށްފައެވެ. އޭގެފަހުން ރައީސް ނަޝީދު އިނގިރޭސިވިލާތުގައި ހުންނަވަނިކޮށް ފޯނު ފޭރިގެންފައިވާ ކަމަށް އެމަނިކުފާނު ވަނީ ވިދާޅުވެފައެވެ.
