ދިވެހިރާއްޖެއާއި ދިވެހިންނަށް އުޖާލާ ދިރިއުޅުމެއް ގެނެސްދިނުމަށް ދިއްލި ދަންމަރު (އެމްޑީޕީ) ގެ އުޖާލާކަން ފަނޑުވެ ނިވިގެން ދިޔަ ދީގެން ނުވާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
މިރޭ ފެށި އެމްޑީޕީގެ ކޮންގްރެސްގައި ވާހަކަފުޅު ދައްކަވަމުން ރައީސް ޞާލިޙް ވިދާޅުވީ، އެމްޑީޕީއަކީ ރާއްޖެއަށް ބޮޑެތި އިސްލާހުތަކެއް ގެނައުމަށް އުފެދުނު ޕާޓީއެއްކަމަށެވެ. އެމަނިކުފާނު ވިދާޅުވީ، އެމްޑީޕީ ތެރޭގައި ހިޔާލުތަފާތުވުން ތަކަށް ޖާގަ އޮންނާނެކަމަށެވެ.
އެގޮތުން ބައެއް ކަންތައްތަކަކީ އެންމެނަށް އެއްބަސްވެވޭ ކަންތައްތައް ކަމަށާއި އަނެއްބައި ކަންކަމަކީ އެއްބަސްވުމަކަށް ނާދެވޭކަންކަން ކަމަށް އެމަނިކުފާނު ވިދާޅުވިއެވެ. އަދި އެހެންކަމުން އޭގައި އޮތްގޮތަކީ ހިޔާލުތަފާތުވުންތަކާއެކު ވެސް ކުރިއަށް ދިޔުން ކަމަށް ވެސް އެމަނިކުފާނު ވިދާޅުވިއެވެ.
“ދިވެހިރާއްޖެއާއި ދިވެހިންނަށް އުޖާލާ މާދަމާއެއް ގެނައުމަށް އަޅުގަނޑުމެން އެކުވެގެން ދިއްލި މި ދަންމަރުގެ އުޖާލާކަން އެންމެ ހިނދުކޮޅަކަށް ވެސް ފަނޑުވެ ނިވުނަދީގެން ނުވާނެ.” ރައީސް ޞާލިޙް ވިދާޅުވިއެވެ.
އެމްޑީޕީއާއިމެދު ފަޚުރުވެރިވެވަޑައިގަންނަވާ ހުންނަވާ ވާހަކަފުޅު ދައްކަވަމުން އެމަނިކުފާނު ވިދާޅުވީ، އެމްޑީޕީ އުފެދުނު ދުވަހު އުފަންވި ކުއްޖާ މި އަންނަ އަހަރު ވޯޓުލާނެ ކަމަށެވެ.
އެމްޑީޕީގެ 4 ވަނަ ކޮންގްރެސް މިރޭ ފެށިގެން ކުރިއަށް ދާއިރު، ރާއްޖޭގެ އެކި ކަންކޮޅުތަކުން ޖުމުލަ 1178 މީހުން މި ކޮންގްރެސްގައި ބައިވެވާން ރަޖިސްޓްރީ ކޮށްފައިވެއެވެ. ކޮންގްރެސްގެ ބައިވެރިން ސޯޝަލް ސެންޓަރުގެ މާލަމް ފުރާލާފައިވާއިރު، ކޮންގްރެސް ކުރިއަށްދާގޮތް ބެލުމަށްވެސް ގިނަ ބަޔަކު ވަނީ އެ ސަރަހައްދަށް ޖަމާވެފައެވެ.
