އެމްޓީސީސީ ނޯތު ލީގު ދެ ވަނަ ޑިވިޝަން މުބާރާތުގައި ގުރޫޕްގެ ސީ ފަހު މެޗަށް ކުޑަފަރީ ފުޓްބޯޅަ ކްލަބު ހާޒިރު ނުވުމުން ޗެމްޕިއަންކަން ކެނދިކުޅުދޫ އަށް ލިބިއްޖެ އެވެ.
މިއަދު ކެނދިކުޅުދޫގައި ކުޅެން އޮތް މެޗަށް ކުޑަފަރީ ހާޒިރު ނުވުމުގެ ސަބަބުން ކެނދިކުޅުދޫ އަށް މެޗު ލިބުނީ 2-0 ގެ ނަތީޖާއަކުންނެވެ.
މި ނަތީޖާ އާއެކު އެޓީމަށް ވަނީ، ހަ މެޗުން 13 ޕޮއިންޓާ އެކު، ނ. އަތޮޅުގެ ޓީމުތައް ވާދަކުރާ ގުރޫޕް ސީގެ އެއްވަނަ ވެސް ލިބިފަ އެވެ. ކުޑަފަރީ ނިންމާލީ ހަތަރު ޕޮއިންޓާ އެކު، ގުރޫޕުގެ ފުލުގަ އެވެ.
މި ގުރޫޕްގެ ދެވަނަ ހޯދައިގެން، ކެނދިކުޅުދޫ އާ އެކު އެއްވަނަ ޑިވިޝަނަށް ދަތުރުކުރީ ހޮޅުދޫ ފުޓުބޯޅަ ކުލަބެވެ.
ހޮޅުދޫގެ ފަހު މެޗުގައި މިއަދު ސޮސައިޓީ ފޯ މާޅެންދޫ ޔޫތު ޑެވެލޮޕްމެންޓާ ވާދަކުރި ފޯރި ގަދަ މެޗު ނިމުނީ ލަނޑެއް ނުޖެހި 0-0 އިން އެއްވަރު ވެގެންނެވެ.
މި ނަތީޖާއާ އެކު ހޮޅުދޫ އިން ގުރޫޕްގެ ސީ ގެ ދެވަނަ ހޯދީ ކުޅުނު ހަ މެޗުން ނުވަ ޕޮއިންޓް ހޯދައިގެންނެވެ. ހޮޅުދޫ ބަލިކޮށްގެން މާޅެންދޫ އަށް އެއްވަނަ ޑިވިޝަނުގެ ޖާގަ ހޯދުމުގެ ފުރުސަތު އޮތް ނަމަވެސް، އެޓީމު ނިންމާލީ، ހަތް ޕޮއިންޓާ އެކު ތިންވަނައިގަ އެވެ.
ހަތަރު ގުރޫޕަކަށް ބަހާލައިގެން ކުރިއަށް ގެންދާ ނޯތު ލީގުގައި ދެން ބާކީ އޮތީ ގުރޫޕް ޑީގެ މެޗުތަކެވެ. މި ގުރޫޕުގެ ފުރަތަމަ މެޗުގައި އަންނަ ބުދަ ދުވަހު ހަވީރު އަލިފުށްޓާއި ދުވާފަރު ބައްދަލުކުރާނެ އެވެ.
ތިން ގުރޫޕުގެ ކުޅުން ނިމިފައި ވާއިރު، މިހާތަނަށް ހަ ޓީމެއް ވަނީ އެއްވަނަ ޑިވިޝަނުގެ ޖާގަ ހޯދައިފަ އެވެ. އެއީ ކެނދިކުޅުދޫ އާއި ހޮޅުދޫގެ އިތުރުން، އެސޯސިއޭޝަން ފޯ ފޯކައިދޫ ޔޫތު ޑެވެލޮޕްމަންޓް، ށ. ފުނަދޫ ޔުނިޓީ ސްޕޯޓްސް ކްލަބް، ހއ. ދިއްދޫ ބީއެކްސް ސްޕޯޓްސް ކްލަބް އަދި ހދ. ކުޅުދުއްފުށީ ޒިގްޒެގް ފޯ ޔޫތު ލިންކޭޖެވެ.
