ކޮވިޑް-19ގެ ދަތި ދުވަސްތަކުގައި ސިފައިންގެ ބޭފުޅުން ކުރެއްވި ބުރަ މަސައްކަތަށް ޑިފެންސް މިނިސްޓަރ މާރިޔާ އަހުމަދު ދީދީ ތައުރީފު ކުރައްވައިފިއެވެ.
އެމްޑީޕީގެ ހަތަރު ވަނަ ކޮންގްރެސްގައި ވާހަކަ ދައްކަވަމުން މިނިސްޓަރ މާރިޔާ ވިދާޅުވީ، ކޮވިޑް ރާއްޖޭން ފެނުމާއި ގުޅިގެން ކަމާއި ބެހޭ އިދާރާތަކުން ގައިޑްލައިންތަކެއް ހެދި ކަމަށާއި އެކަމުގެ ތެރޭގައި އެމްއެންޑީއެފުން ވެސް އެހަރަކާތުގައި ބައިވެރިވެފައިވާ ކަމަށެވެ.
އޭގެ ތެރެއިން ރާއްޖޭގެ އެކި ސަރަހައްދުތަކުގައި ހެދި 33 ކޮވިޑް ފެސިލިޓިތައް ހަދައި އެތަންތަން މެނޭޖް ކުރުމުގައި އެމްއެންޑީއެފްގެ ދައުރު ވަރަށް ބޮޑު ކަމަށް މާރިޔާ ފާހަގަ ކުރެއްވިއެވެ.
އަދި ކޮވިޑުގެ ދަތި ދުވަސްތަކުގައި އެއްރަށުން އަނެއް ރަށަށް މީހުން އުފުލުގައި ކަނޑު މަގުން 10،683 ދަތުރު އެމްއެންޑީއެފުންކޮށް ރައްޔިތުން ބޭނުންވާ ހިދުމަތްތަ ފޯރުކޮށްދީފައިވާކަން ވެސް މާރިޔާ ފާހަގަ ކުރެއްވިއެވެ.
ސިފައިންގެ ބޭފުޅުންގެ އިތުރުން ކޮވިޑުގެ ތެރޭގައި އިމިގްރޭން، ކަސްޓަމްސް، އޭވިއޭޝަން ސެކިއުރިޓީގެ މުވައްޒަފުންގެ ހިއްސާ ވެސް ވަރަށް ބޮޑުކަން މާރިޔާ ވަނީ ފާހަގަ ކުރައްވާފައެވެ.
“ފުރަތަމަ ކޮވިޑްއޭ ބުނީމަ ހަރަކާތްތެރިވި ސިފައިންނަށް އޭރު އެ އާ ކަމުން އަދި ފަހުން އެ ނެގެޓިވް ކަމަށް ވީ، އެހެން ވިއަސް ޕްރޮޕާ ޕްރޮޓެކްޓިވް ގިއާ ވެސް ލިބިފަކާއެއް ނެތް. އެހެންވިއަސް އެކުދިން ނުކުމެ އެކަމުގަ ހަރަކާތްތެރިވި.” މާރިޔާ ވިދާޅުވިއެވެ.
މާރިޔާ ވިދާޅުވީ، ކޮވިޑުގެ އެންމެ ބޮޑު ރާޅު ރާއްޖެއަށް ބިންދާލީ މުލަ ރޯދައިގެ ފުރަތަމަ ދުވަހު ކަމަށާއި އެހެން ކަމުން ރައްޔިތުން ތިބީ ގޭތެރެއަށް ފެނާއި ކާބޯތަކެތި ވައްދާނެ ގޮތް ހުސްވެފައި ކަމުން އެހާލަތުގައި ގޭގެއަށް ބޭނުންވާ ކާޑާއި އެހެނިހެން ތަކެތި ގެތަކަށް ވެއްދުމުގައި ވެސް އެމްއެންޑީއެފްގެ ބޭފުޅުންގެ ބޮޑު ހިއްސާއެއް އޮތް ކަމަށެވެ.
“މިދިޔަ ތިން އަހަރު ތެރޭގަ ކުރެވުނު ކަމެއް ތިބޭފުޅުން ފަހަރެއްގަ ފޫހިފުޅު ވެސް ވެދާނެކަން ނޭނގެ މިވާހަކަ އަޑުއައްސަވަން. އެހެން ވިއަސް ބޮޑު ހަރަކާތެއް އަޅުގަނޑުމެންގެ ދިފާއީ ދާއިރާއިން ކުރި ކޮވިޑުގެ ރެސްޕޮންސްގަ” މާރިޔާ ވިދާޅުވިއެވެ.
