ކޮވިޑް 19 ސަބަބުން މެދު ކަނޑާލި “އާދަމް ސަލީމް ކަޕް 2021” 255 ދުވަސް ފަހުން ފަށައިފިއެވެ.
27 ނޮވެންބަރު 2021 ވަނަދުވަހު ހަވީރު ފެށި އާދަމް ސަލީމް ކަޕް 2021 މެދު ކަނޑާލަން ޖެހުނީ ކޮވިޑް 19 ކޭސްތަކެއްފެނި ގިނަ ކުޅުންތެރިން ކަރަންޓީން ކުރަންޖެހުމާއި ގުޅިގެން 8 ޑިސެންބަރު 2021 ގައެވެ.
އަލުން މުބާރަތް ފެށި މެޗުގައި އިއްޔެ ބައްދަލު ކުރީ ރިއަލް ސްޓާސްއާއި ޔުނީފޯމެވެ. މި މެޗު ނިމިގެން ގޮސްފައި ވަނީ 1-1 ގެ ނަތީޖާއިން ދެ ޓީމް އެއްވަރު ވެގެންނެވެ.
މެޗު ފަށައިގެން ރިއަލް ސްޓާސްއިން ވަނީ މެޗު ކޮންޓްރޯލް ކޮށްގެން ކުޅެފައެވެ. ނަތީޖާއެއްގެ ގޮތުން ފުރަތަމަ ހާފުގައި އެ ޓީމުން ވަނީ ލަނޑުޖަހައި ލީޑު ނަގާފައެވެ. މި ލަނޑު އެ ޓީމަށް ކާމިޔާބު ކޮށްދީފައި ވަނީ މޫސާ ކައުޔަޝްއެވެ.
ނަމަވެސް ދެވަނަ ހާފުގައި ޔުނީފޯމް ޓީމުން ވަނީ ކުޅުން ރަނގަޅުކޮށް ރިއަލް ސްޓާސްއަށް ބާރު ބޮޑު ކޮށްފައެވެ. މިގޮތުން ޔުނީފޯމް ޓީމުން ގިނަ ހަމަލާތަކެއް އުފައްދާ ނަތީޖާ ހަމަހަމަ ކުރެވިފައި ވަނީ މެޗުގެ ފުރިހަމަ ވަގުތު ހަމަވެ ދެއްކި އިތުރު ވަގުތުގެ ތެރޭގައެވެ. ޔުނީފޯމަށް މި ލަނޑު ކާމިޔާބު ކޮށްދީފައި ވަނީ، ރިއަލް ސްޓާސްގެ އޭރިޔާގެ ބޭރުން ލިބުނު ހިލޭ ޖެހުމަކުން ޔުނީފޯމް ޓީމުން މުޙައްމަދު އަލީއެވެ.
މި މެޗުގެ މޮޅު ކުޅުންތެރިއަކަށް ހޮވިފައި ވަނީ ޔުނީފޯމް ޓީމްގެ ޑިފެންސްގައި މޮޅު ކުޅުމެއް ދެއްކި ޔުނީފޯމް ޓީމުގެ ޖޯޒީ ނަމްބަރު 20 ހުސެއިން ރަމީޒްއެވެ.
މި މުބާރާތުގެ މެޗެއް މިއަދުވެސް ކުޅުމަށް ވަނީ ހަމަޖެހިފައެވެ. މި މެޗުގައި ބައްދަލުކުރާނީ އަހުލީއާއި ރޫޙެވެ.
އާދަމް ސަލީމް ކަޕް މުބާރާތަކީ ހަނިމާދޫ ގައި ފުޓްބޯޅައިން ފާހަގަ ކޮށްލެވުނު ހުނަރުވެރިއެއް ކަމަށްވާ، ހަނިމާދޫ ޒުވާނުންގެ ޖަމިއްޔާގެ މެމްބަރު އަލްމަރުޙޫމު އާދަމް ސަލީމުގެ ހަނދާނުގައި ހަނިމާދޫ ޒުވާނުންގެ ޖަމިއްޔާއިން ކޮންމެ ދެ އަހަރުން އެއް އަހަރަކު ބާއްވަމުން އަންނަ މުބާރާތެކެވެ.
މި އަހަރުގެ މުބާރާތް ކުޅެން ހަމަޖެހިފައިވަނީ ކޮންމެ ޓީމެއް ކޮންމެ ޓީމަކާއި ވާދަކޮށް އެންމެ ގިނަ ޕޮއިންޓު ހޯދާ ޓީމަކަށް ފައިނަލުގެ ފުރަތަމަ ޖާގަ ލިބޭ ގޮތަށެވެ. ފައިނަލުގެ ދެވަނަ ޖާގަ ލިބިގެންދާނީ ފުރަތަމަ ބުރު ނިމޭއިރު ޕޮއިންޓު ތާވަލުގެ ދެވަނަ ޓީމާއި ތިންވަނަ ޓީމުގެ މެދުގައި ކުޅެވޭ ސެމީ ފައިނަލުގެ މެޗުން މޮޅުވާ ޓީމަކަށެވެ.
