ބޭނުންޖެހިފައިވާ 100 އަށްވުރެ ގިނަ ޢާއިލާއަށް ބޭންކް އޮފް މޯލްޑިވްސް (ބީއެމްއެލް) އިން އެހީ ފޯރުކޮށްދީފިއެވެ.
ބައިނަލްއަޤްވާމީ އިންސާނިއްޔަތުކަމުގެ ދުވަހާ ގުޅުވައިގެން ކުރިއަށް ގެންދާ މި ޕްރޮގްރާމުގެ ދަށުން ފޯރުކޮށްދިނުމަށް ހަމަޖެހިފައިވަނީ އަސާސީ ކާބޯތަކެތީގެ އެހީއެވެ. މި ޕްރޮގްރާމަކީ ބޭންކް އޮފް މޯލްޑިވްސް (ބީއެމްއެލް) އާއި އެޑްވޮކޭޓިންގ ރައިޓްސް އޮފް ޗިލްޑްރެން (އާކް) ގުޅިގެން ކުރިއަށްދާ ޕްރޮގްރާމެކެވެ.
މިހާތަނަށް މި ޕްރޮގްރާމްގެ ދަށުން މާލޭ ސަރަހައްދުގެ ބޭނުންޖެހިފައިވާ 100 އަށްވުރެ ގިނަ ޢާއިލާތަކަށް އަސާސީ ކާބޯތަކެތީގެ ޕެކޭޖްތައް ފޮނުވާފައިވާކަމަށް ބީއެމްއެލްއިން ވިދާޅުވެއެވެ.
ބޭންކް އޮފް މޯލްޑިވްސް އިން ވަނީ 2021 ވަނަ އަހަރު ރަމަޟާންމަހުވެސް ބޭނުންޖެހިފައިވާ ޢާއިލާތަކަށް އެހީވުމަށް އާކް އެއިޑް ޕްރޮގްރާމަށް އެއް ލައްކަ ރުފިޔާ ހަދިޔާކޮށްފައެވެ.
ބައިނަލްއަޤްވާމީ އިންސާނިއްޔަތުކަމުގެ ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެވެސް އޮގަސްޓްމަހުގެ 19ވަނަ ދުވަހެވެ. އދ އިން އަންދާޒާކުރާ ގޮތުގައި 2022 ވަނަ އަަހަރުގެ ނިޔަލަށް އިންސާނީ އެހީތެރިކަމާއި ރައްކާތެރިކަން ބޭނުންވާ މީހުންގެ ޢަދަދު 274 މިލިއަނަށް އަރާނެއެވެ.
