ގއ. ދާންދޫ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއުގެ މަސައްކަތް ބާރަށް ކުރިއަށްދާ ކަމަށް އެ މަޝްރޫއުގެ ކޮންޓްރެކްޓަރު، އެމްޓީސީސީން ބުނެފި އެވެ.
އެމްޓީސީސީއިން މިހާރު ވަނީ ބިން ހިއްކުމުގެ މަޝްރޫއުވެސް ފަށާފައެވެ. އެގޮތުން ބިން ހިއްކުން ކުރިޔަށް ދަނީ ގޮނޑުދޮށް ހިމާޔަތްކުރުމާއި އެކުގައެވެ. މި މަސައްކަތަށް އެމްޓީސީސީގެ ޑްރެޖަރެއްވެސް އަންނަނީ އެރަށުގައި ހަރަކާތްތެރިވަމުންނެވެ.
ޖުމުލަ 186.6 މިލިއަން ރުފިޔާގެ މި މަޝްރޫއުގެ ދަށުން، 25 ހެކްޓަރުގެ ބިން ހިއްކުމާއި 1238 މީޓަރުގެ ސަރަހައްދެއްގައި ބޮޑުހިލައިގެ ރިވެޓްމެންޓް ޖެހުމާއި 240 މީޓަރުގެ ސަރަހައްދެއްގައި ގްރޮއިން ޖެހުން ހިމެނެ އެވެ.
މި މަޝްރޫއުގެ ދަށުން މިދިޔަ ޖޫން މަހުގެ ތެރޭގައި ބަންޑް ވޯލްގެ މަސައްކަތް ވަނީ ނިންމައިފަ އެވެ.
ދާންދޫ ބިން ހިއްކުމުގެ މަޝްރޫއު އެމްޓީސީސީއާ ހަވާލުކުރީ ނޮވެމްބަރު 10، 2020ގަ އެވެ. އަދި މިދިޔަ އަހަރުގެ އޮގަސްޓު މަހުގެ ތެރޭގައި އެ މަޝްރޫއުގެ އަމަލީ މަސައްކަތް ވަނީ ފަށައިފަ އެވެ.
