ނޯތު ލީގު ދެ ވަނަ ޑިވިޝަނުގައި އިއްޔެ ހަވީރު ދުވާފަރު ސްޕޯޓްސް ކުލަބާއި އުނގޫފާރު ފުޓުބޯޅަ ކުލަބް ބައްދަލުކުރި މެޗު 0-0 އިން އެއްވަރުވެ، އުނގޫފާރާއި އަލިފުށި ރެކްރިއޭޝަން ކުލަބަށް އެއް ވަނަ ޑިވިޝަނުގެ ޖާގަ ޔަގީންވެއްޖެ އެވެ.
މި ނަތީޖާއާ އެކު ތިން ޓީމު ވާދަކުރާ ގުރޫޕު ޑީ ގެ ފުލުގައި ދުވާފަރު ނިންމާލީ ތިން ޕޮއިންޓް ހޯދައިގެންނެވެ. އަލިފުށްޓަށް ހަތަރު ޕޮއިންޓް ލިބިފައި ވާއިރު، އުނގޫފާރަށް ވަނީ ފަސް ޕޮއިންޓް ލިބިފަ އެވެ.
ރ. އަތޮޅުގެ ޓީމުތައް ހިމެނޭ މި ގުރޫޕުގައި ބާކީ އޮތީ އަލިފުށްޓާއި އުނގޫފާރު ބައްދަލުކުރާ މެޗެވެ.މި މެޗު ހޮނިހިރު ދުވަހުގެ ހަވީރު 4 ޖަހާއިރު ކުޅޭނެއެވެ.
ނަމަވެސް މިހާރު މިވަނީ އަންނަ އަހަރު ފަށަން ހަމަޖެހިފައިވާ ނޯތު ލީގުގެ އެއް ވަނަ ޑިވިޝަން މުބާރާތަށް ކޮލިފައިވާ އަށް ޓީމު ޔަގީން ވެފަ އެވެ.
އެ ޓީމުތަކަކީ އުނގޫފާރާއި އަލިފުށީގެ އިތުރުން، ހއ. ދިއްދޫ ބީއެކްސް ސްޕޯޓްސް ކްލަބް، ހދ. ކުޅުދުއްފުށީ ޒިގްޒެގް ފޯ ޔޫތު ލިންކޭޖް، އެސޯސިއޭޝަން ފޯ ފޯކައިދޫ ޔޫތު ޑެވެލޮޕްމަންޓް، ށ. ފުނަދޫ ޔުނިޓީ ސްޕޯޓްސް ކްލަބް އަދި ނ. އަތޮޅުގެ ކެނދިކުޅުދޫ ފުޓުބޯޅަ ކުލަބާއި ހޮޅުދޫ ފުޓްބޯޅަ ކުލަބެވެ.
ފޮޓޯ: އެންއެސްސީ ބިގްމޭން (އައްޔަ)
