ހދ އަތޮޅު ޤުރުއާން މުބާރާތުގައި ހަނިމާދޫ ތަމްސީލް ކުރާނެ ދަރިވަރުން ހޮވައިފިއެވެ.
މި ދަރިވަރުން ހޮވުމަށް ހަނިމާދޫ ކައުންސިލް އަދި ހަނިމާދޫ ސްކޫލް ގުޅިގެން ވަނީ މިމަހު 1 އަދި 2 ވަނަ ދުވަހު 64 ދަރިވަރުންނާއެކު އޮޑިޝަނެއް ކުރިޔަށް ގެންގޮސްފައެވެ.
މި އޮޑިޝަނުގައި ފަނޑިޔާރުކަން ކޮށްދެއްވީ ހއ އަތޮޅު މަދަރުސާގެ ޤުރުއާން މުދައްރިސް އަލްފާޟިލް އަޙްމަދު ސުޖާއު އާއި ޕޮލިސް ސާޖަންޓް އަލްފާޟިލް މުޙައްމަދު ހުސެއިން ގެ އިތުރުން ހއ އަތޮޅު މަދަރުސާގެ ޤުރުއާން މުދައްރިސާ އަލްފާޟިލާ ހައްވާ ސާއިދާއެވެ.
ކީސްޓޭޖްތަކަށް ބަހާލައިގެން ކުރިޔަށް ގެންދިޔަ އޮޑިޝަނުގައި ނުބަލާ ކިޔެވުމުގެ ގޮފިން 5 ދަރިވަރުން ބައިވެރިވީ އިރު އެއްވެސް ދަރިވަރަކަށް ސުވާލު ފުރިހަމަ ނުކުރެވޭތީ އެ ކެޓަގަރީން ދަރިވަރުން ހޮވާފައި ނުވެއެވެ.
ބަލައިގެން ކިޔެވުމުގެ ކެޓަގަރީން 59 ދަރިވަރުން ވާދަކޮށް 75 މާކުހައްވުރެން މަތިން މާކުސް ހޯދާ އަތޮޅު ޤުރުއާން މުބާރާތަށް ހޮވިފައިވަނީ މަޙްދީ ބިން ޢަލީ އިބަރާހީމް، ފާތުމަތު މާޝާ ބިންތު އަޙުމަދު، ސަމާ މުޙައްމަދު، އާމިނަތު ނަޒާތު ޝާހިދު، ޝަބާ ޢަބްދުﷲ ރަޝީދު، މިޝްކާ މުޙައްމަދު އަޝްރަފް، މަރްޔަމް އިބާ އަދި ޒަހާ ޖައުފަރެވެ.
ރޭ ވަނީ އޮޑިޝަން ނިންމުމުގެ ރަސްމީއްޔާތު ކުރިޔަށް ގެންގޮސްފައެވެ. ހަފުލާގައި ވަނީ އޮޑިޝަނުން ހޮވުނު ދަރިވަރުންނަށް ސެޓްފިކެޓް އަދި ހަނިމާދޫ ކައުންސިލްގެ ފަރާތުން އޮޑިޝަނުން ހޮވޭ ކޮންމެ ދަރިވަރަކަށް ދޭ 2000 ރުފިޔާގެ ފައިސާގެ އިނާމް ހަވާލު ކޮށްފައެވެ. ސެޓްފިކެޓް އަދި ފައިސާގެ އިނާމް ދަރިވަރުންނާ ހަވާލު ކޮށްދެއްވީ ހަނިމާދޫ ކައުންސިލްގެ ރައީސް އަބުދުލް ސައްތާރު ހަސަނެވެ.
ހދ އަތޮޅު ކައުންސިލުންގެ އިންޒާމް ކުރާ “ހދ.އަތޮޅު ޤުރުއާން މުބާރާތް 1444” ކިޔެވުން އޮކްޓޫބަރ 6 ން ފެށިގެން 8 ވަނަދުވަހުގެ ނިޔަލަށް ކުރިޔަށް ދަނީ ހދ.ނޮޅިވަރަމުގައެވެ.
