އެމްޓީސީސީ ނޯތު ލީގު ދެވަނަ ޑިވިޝަން ގްރޫޕް ޑީގެ ފަހު މެޗު އެއްވަރުވެ އެއްވަނަ އުނގޫފާރަށް ލިބިއްޖެއެވެ.
މިއަދު ހަވީރު އަލިފުށީ ފުޓްބޯޅަ ދަނޑުގައި ކުޅުނު މެޗު އެއްވަރުވީ ލަނޑެއް ނުޖެހިއެވެ. މިނަތީޖާއާއެކު އުނގޫފާރަށް އެއްވަނަ ލިބުނީ ހަތަރު މެޗުން ހަ ޕޮއިންޓާއެކުއެވެ. ދެވަނަ ލިބުނު އަލިފުއްޓަށް ލިބުނީ ފަސް ޕޮއިންޓެވެ. މިގްރޫޕުގައި ދެން ހިިމެނޭ ދުވާފަރަށް ފުރުސަތު ގެއްލުނު އިރު އެ ޓީމަށް ލިބުނީ ތިން މެޗު އެއްވަރުކޮށްގެން ލިބުނު ތިން ޕޮއިންޓެވެ.
އަންނަ އަހަރު ފަށަން ހަމަޖެހިފައިވާ ނޯތު ލީގުގެ އެއް ވަނަ ޑިވިޝަން މުބާރާތަށް ކޮލިފައިވާ އަށް ޓީމު ތަކަކީ އުނގޫފާރާއި އަލިފުށީގެ އިތުރުން، ހއ. ދިއްދޫ ބީއެކްސް ސްޕޯޓްސް ކްލަބް، ހދ. ކުޅުދުއްފުށީ ޒިގްޒެގް ފޯ ޔޫތު ލިންކޭޖް، އެސޯސިއޭޝަން ފޯ ފޯކައިދޫ ޔޫތު ޑެވެލޮޕްމަންޓް، ށ. ފުނަދޫ ޔުނިޓީ ސްޕޯޓްސް ކްލަބް އަދި ނ. އަތޮޅުގެ ކެނދިކުޅުދޫ ފުޓުބޯޅަ ކުލަބާއި ހޮޅުދޫ ފުޓްބޯޅަ ކުލަބެވެ.
