ޔުއެފާ ޗެމްޕިއަންސް ލީގުގެ ފުރަތަމަ މެޗުގައި ވަރުގަދަ ޗެލްސީ ބަލިކޮށް ޑައިނަމޯ ޒަގްރެބްގެ ފެށުން ރަނގަޅުކޮށްފިއެވެ.
މުބާރާތުގެ ފުރަތަމަ މެޗުގައި ޗެލްސީގެ މައްޗަށް ޑައިނަމޯ ޒަގްރެބް ކުރިހޯދީ 1-0ންނެވެ. ޑައިނަމޯ ޒަގްރެބްގެ ދަނޑުގައި ކުޅުނު މި މެޗުގެ ހަމައެކަނި ލަނޑު 13 ވަނަ މިނެޓުގައި އެޓީމަށް ކާމިޔާބުކޮށްދިނީ މިސްލަވް އޮރިސިޗްއެވެ. އޭގެ ފަހުން ޗެލްސީން ލަނޑު ޖަހާނެ ރަނގަޅު ފުރުސަތުތަކެއް ތަނަވަސްކުރި ނަމަވެސް ޑައިނަމޯ ޒަގްރެބްގެ ކީޕަރު ޑޮމިނިކް ލިވަކޯވިޗް ވަނީ ހުށިޔާރުކަމާއެކު އެހަމަލާތައް ދިފާއުކޮށްފައެވެ. އަދި ޑައިނަމޯ ޒަގްރެބްއަށް ކައުންޓަރ އެޓޭކުގައި ލީޑު ފުޅާކުރަން ލިބުނު ފުރުސަތުތަކުގެ ބޭނުންވެސް ނުހިފުނެވެ.
މުބާރާތުގައި ޑައިނަމޯ ޒަގްރެބްއާއި ޗެލްސީ އޮތީ ގްރޫޕް ގްރޫޕް އީގައެވެ. މި ގްރޫޕްގައި ދެން ހިމެނެނީ އޭސީ މިލާނާއި ސަލްޒްބާގްއެވެ. މި ދެޓީމު ބައްދަލުކުރި މެޗު ނިމުނީ ކޮންމެ ޓީމަކުންވެސް ލަނޑެއް ޖަހާ އެއްވަރުވެގެންނެވެ. މެޗުގެ 28 ވަނަ މިނެޓުގައި ފުރަތަމަ ލަނޑުޖަހާ ލީޑު ނެގީ ސަލްބާގްއިންނެވެ. މި ލަނޑު އެޓީމަށް ކާމިޔާބުކޮށްދިނީ ނޯހް އޮކާފޯރްއެވެ. މެޗުގެ 40 ވަނަ މިނެޓުގައި މިލާނަށް ނަތީޖާ ހަމަހަމަކޮށްދިނީ އަލެކްސިސް ސެލްމީކާސްއެވެ.
މި ނަތީޖާއާއެކު ޑައިނަމޯ ޒަގްރެބް ގްރޫޕްގެ އެއްވަނާގައި އޮތީ ތިން ޕޮއިންޓު ހޯދައިގެންނެވެ. މިލާނާއި ސަލްޒްބާގަށް ލިބެނީ ކޮންމެ ޓީމަކަށް އެއް ޕޮއިންޓެވެ. ޕޮއިންޓެއް ނުލިބި ގްރޫޕުގެ ފުލުގައި އޮތީ ޗެލްސީއެވެ.
