ގދ. މަޑަވެލި-ހޯޑެއްދޫ ކޯޒްވޭ އަކުން ގުޅާލުމުގެ މަސައްކަތް އެމްޓީސީސީން މިއަދު ފަށައިފި އެވެ.
ހޯޑެއްދޫގައި ބޭއްވުނު މި ރަސްމިއްޔާތުގައި މަޑަވެލީ ދާއިރާގެ މަޖިލިސް މެމްބަރު ޙުސައިން ފިރުޝާންއާއި، މަޑަވެލީ ކައުންސިލްގެ ރައީސް ފިޔާޒް ޙަސަންއާއި، ހޯޑެއްދޫ ކައުންސިލްގެ ރައީސް ޙުސައިން ވާރިޝްއާއި އެމްޓީސީސީގެ ޗީފް އެގްޒެކެޓިވް އޮފިސަރ އާދަމް އާޒިމްގެ އިތުރުން އެމްޓީސީސީގެ އިސްވެރިން ބައިވެރިވެ ވަޑައިގެންނެވި އެވެ.
މި މަޝްރޫޢުގެ ދަށުން، 260 މީޓަރުގެ ސަރަޙައްދެއްގެ ގޮނޑުދޮށް ހިމާޔަތް ކުރުމާއި، 262 މީޓަރުގެ މަގެއް ހެދުމާއި، މަގު މާކު ކުރުމާއި، ޕޭވްމަންޓް ހެދުމާއި، މަގުބައްތި ހަރުކުރުމުގެ މަސައްކަތް ހިމެނެ އެވެ. މި ކޯޒްވޭގެ ދިގުމިނަކީ 383 މީޓަރެވެ.
މިއީ 84.17 މިލިއަން ރުފިޔާގެ މަޝްރޫޢެކެވެ. އަދި މި މަޝްރޫޢުއަކީ 300 ދުވަހުގެ ތެރޭގައި ނިންމުމަށް ހަމަޖެހިފައިވާ މަޝްރޫޢެކެވެ.
އެމްޓީސީސީން ބުނީ މި ކޯޒްވޭ މިހާރު ޕްލޭން ކުރެވިފައިވާ، މުއްދަތުގެ ތެރޭގާއި ނިމި، ރައްޔިތުންނަށް، ޚިދުމަތް ލިބެންފަށާއިރު، މިހާރު ތަޖުރިބާކުރާ، ރަށް ގިރުމުގެ މައްސަލައަށް ވެސް، ޙައްލު ލިބިގެންދާނެ ކަމަށެވެ.
