ހަނިމާދޫ ކައުންސިލުގެ ރައީސްގެ ޢައިރު ހާޒިރުގައި އެގްރިކަލްޗަރ ސެންޓަރުގެ ބިން ނަގަން ފާސްކޮށްފިއެވެ.
މިއަދު ހަނިމާދޫ ކައުންސިލުން ބޭއްވި ހަނިމާދޫ ކައުންސިލްގެ 61 ވަނަ ޖަލުސާއަށް ހާޒިރުނުވަނީ ހަމައެކަނި ކައުންސިލްގެ ރައީސް ޢަބްދުއް ސައްތާރު ހަސަނެވެ. އޭނާ ޖަލުސާއަށް ހާޒިރުނުވި ސަބަބު ޖަލުސާގެ ރިޔާސަތުން ހާމައެއް ނުކުރައްވައެވެ. ނަމަވެސް ޖަލުސާ ތަކުގައި މެންބަރަކު ބައިވެރި ނުވާނަމަ ރިޔާސަތުން މީގެކުރިން ސަބަބު ބަޔާންކުރެއެވެ.
މިއަދު ޖަލުސާއަށް ނައިބު ރައީސް ފިރާގް ހުށައެޅުއްވީ ހަނިމާދޫ އެގްރިކަލްޗަރ ސެންޓަރއަށް އިތުރުކޮށްފައިވާ 167902 އަކަފޫޓުގެ ބިން ރަޖިސްޓްރީން އުނިކޮށް ހަނިމާދޫ ކައުންސިލަށް ނެގުމަށެވެ. މިއީ މިބިން ނަގަން ތާވަލުކުރި ދެވަނަ ފަހަރެވެ.
މި ހުށައެޅުން ފާސްކުރީ ޖަލުސާގައި ބައިވެރިވި 4 މެންބަރުންގެ ތެރެއިން 3 މެންބަރުގެ އިއްތިފާގުންނެވެ. އުސޫލު އޮންނަގޮތުން ރިޔާސަތުގައި އިންނަ ފަރާތަށް ވޯޓެއް ނުލެވެއެވެ.
މީގެ ކުރިން މި މައްސަލަ ހުށަހަޅާ ބިން ނަގަން ތާއީދުކުރީ އަލީ އިބްރާހީމާއި ފިރާގެވެ. ނާޒިޔާ އަދި ހާރިސާ ވަކި ކޮޅަކަށް ވޯޓު ނުދެއްވައެވެ. އެޖަލުސާގެ ރިޔާސަތު ބެލެހެއްޓީ ރައީސް ސައްތާރެވެ. އެއީ ހަނިމާދޫ ކައުންސިލްގެ 40 ވަނަ ޖަލުސާއެވެ.
