ހަނިމާދޫ ކައުންސިލު 2021 ވަނަ އަހަރުގެ އޮޑިޓުން ފާހަގަކުރެވިފައިވާ ކައުންސިލުގެ ތިޖޫރީން 95000 ރުފިޔާ މަދުވުމުގެ މައްސަލަ ނުބަލަން ހަނިމާދޫ ކައުންސިލުން ފާސްކޮށްފިއެވެ.
މިއަދު ކުރިޔަށް ދިޔަ އެކައުންސިލުގެ 61 ވަނަ ބައްދަލުވުމުގައި ނައިބު ރައީސް ފިރާގު ވަނީ އޮޑިޓް ކުރުމުގައި ފާހަގަވި މައްސަލައެއް ކަމުގައިވާ ތިޖޫރީން ފައިސާ މަދުވި މައްސަލަ ބަލައިދިނުމަށް އެދި އެސީސީ އަށް ފޮނުއްވުމަށް ނިންމަައިދިނުމަށް ހުށަހަޅާފައެވެ. ނަމަވެސް އެ ހުށަހެޅުމަށް ތާއީދުކުރެއްވީ ޖޭޕީ މެންބަރު ހާރިސާ އެކަންޏެވެ.
އެމްޑީޕީގެ މެންބަރު ނާޒިޔާ އަދި އަލީ އިބްރާހީމް ތާއީދުކުރެއްވީ އޮޑިޓް ރިޕޯޓް ނެރުމުން އެއަށްފަހު ރިޕޯޓުގައި ހުންނަ ހުރިހާ ކަމެއް ބަލައިދޭން އެސީސީއަށް ހުށަހަޅާށެވެ. 4 މެންބަރުން ބައިވެރިވި ޖަލުސާއެއްކަމުން ފާސްވީ އަލީ އިބްރާހީމް ހުށަހެޅުއްވި ގޮތަށެވެ.
ޖަލުސާއަށް ފަހު ގޮށްކޮޅަށް މައުލޫމާތު ދެއްވަމުން ނައިބު ރައީސް ފިރާގް ވިދާޅުވީ މެންބަރުން ތާއީދުނުކުރެއްވި ނަމަވެސް މިހާރު ވާނީ ކައުންސިލްގެ ނައިބުގެ ހައިސިއްޔަތުން އެމައްސަލަ ބަލައިދޭން އެސީސީގައި އެދިފައިކަމަށެވެ.
