މިފްކޯގެ ދަށުން ހިންގަމުން އައި 14 އައިސްޕްލާންޓެއް ހިންގުން ފެނަކަ ކޯޕަރޭޝަނާ މިއަދު ހަވާލުކޮށްފިއެވެ.
އައިސްޕްލާންޓުތައް ފެނަކަ އާ ހަވާލުކޮށްފައިވަނީ މިއަދު ބޭއްވި ރަސްމިއްޔާތެއްގައެވެ. ފެނަކަ ހެޑް އޮފީހުގައި ބޭއްވި އެ ރަސްމިއްޔާތުގައި ފިޝަރީޒް މިނިސްޓަރު، ޑރ. ހުސައިން ރަޝީދު ހަސަން އާއި މިފްކޯގެ މެނޭޖިން ޑިރެކްޓަރު، އިސްމާއިލް ފައުޒީގެ އިތުރުން ފެނަކައިގެ މެނޭޖިން ޑިރެކްޓަރު، އަހުމަދު ސައީދުއާއި އެސްޓީއޯގެ މެނޭޖިން ޑިރެކްޓަރު، ހުސައިން އަމްރު އަދި ފިނޭންސް މިނިސްޓަރު އިބްރާހިމް އަމީރުވެސް ބައިވެރިވެވަޑައިގެންނެވި އެވެ.
އެ އައިސްޕްލާންޓުތައް ފެނަކައާ ހަވާލުކުރުމާއެކު އެތަންތަނުގައި ހުރި މަރާމާތުގެ މަސައްކަތްތައް ނިންމައި، އެ ކުންފުނީގެ އިންޖީނުގެތަކާ އައިސްޕްލާންޓުތައް ގުޅައި، ސީދާ އެކުންފުނީގެ ދަށުން ޚަރަދު ހިނގާގޮތަށް އެތަންތަން ބަދަލުކުރެވޭނެ ކަމަށެވެ. އަދި އޭގެ އިތުރުން، އެ ތަންތަނުގައި ސޯލާ ޕެނަލް ހަރުކުރުމުގެ މަސައްކަތްވެސް ކުރާނެ ކަމަށް ވިދާޅުވިއެވެ.
އެ ކުންފުންޏާ ހަވާލުކުރި 14 އައިސްޕްލާންޓުގެ ތެރެއިން އޮޕަރޭޝަންގައި ހުރީ 12 އައިސްޕްލާންޓެވެ. ދެ އައިސްޕްލާންޓެއް ހުރީ އޮޕަރޭޝަނަލް ހާލަތުގައެއް ނޫނެވެ. ސައީދު ވިދާޅުވީ އެތަންތަނުގައި ކުރަން ހުރި މަރާމާރުގެ މަސައްކަތް ވީއެންމެ އަވަހަކަށް ކޮށް، މަސްވެރިންނަށް ޚިދުމަތް ފޯރުކޮށްދޭނެ ކަމަށެވެ.
