އެއް ޖިންސުން ގުޅުން ހިންގި ޑްރަގް އެންފޯސް ޑިޕާޓްމަންޓްގެ އަބްދުއްރަހްމާން ރަފީއު (ދޮންދިގު) ގެ މައްޗަށް 1 އަހަރާއި ދެ މަހުގެ ޖަލު ހުކުމެއް އިއްވައިފިއެވެ
އޭނާގެ މައްޗަށް އެއް ޖިންސުން ގުޅުން ހިންގިކަމުގެ ދައުވާ ކޮށްފައިވަނީ ބަންގްލަދޭޝްގެ ރައްޔިތެއް ކަމުގައިވާ އަލަމްގީރާއެކު އޭނާގެ ވީޑިޔޯއެއް ސޯޝަލް މީޑިޔާއަށް ލީކުވި ހިސާބުންނެވެ.
ކްރިމިނަލް ކޯޓުން އޭނާގެ މައްޗަށް ކުށްސާބިތުވާކަމަށް ނިންމައި، 1 އަހަރާއި 2 މަހާއި 12 ދުވަހުގެ ޖަލު ހުކުމެއް ވަނީ އިއްވާފައެވެ. އެހެންނަމަވެސް މިވީހާތަނަށް އޭނާ ބަންދުގައި ހުރި މުއްދަތުން އެދުވަސްތައް ކެނޑުމަށްފަހު ދެން އޭނާ ޖަލު ބަންދުގައި ހުންނަން ޖެހޭނީ 1 އަހަރާއި 1 މަހާއި 28 ދުވަހަށެވެ.
އެއް ޖިންސުން ގުޅުން ހިންގި މައްސަލަތަކުގައި މީގެ ކުރިން އިއްވި ހުކުމްތަކަށް ބަލައިލާއިރު އަލަމްގީރްގެ މައްޗަށް އިއްވާފައިވަނީ 7 މަހުގެ ޖަލު ހުކުމެވެ. އަދި ނާޒިމް އަބްދުއްސައްތާރަށް ހުކުމްކުރީ 4 މަސް ދުވަހަށް ގޭ ބަންދުކުރުމަށެވެ. ނާޒިމަށް ދިން އަދަބު ލުއިވި ސަބަބެއްކަމަށް ފާހަގަކޮށްފައިވަނީ އޭނާ އެކުށަށް އިއުތިރާފްވެ، ތައުބާ ވެފައިވާތީއެވެ.
އެއްޖިންސުން ގުޅުން ހިންގި މައްސަލަތަކުގައި އަދިވެސް އިތުރު މީހުންގެ މައްސަލަތައް ފުލުހުން އަންނަނީ ތަހުގީގުކުރަމުންނެވެ.
