އިންޑިއާގެ އެގްޒިމް ބޭންކުގެ ލޯނުގެ ދަށުން ހދ.ހަނިމާދޫ އެއާޕޯޓު ތަރައްޤީކޮށް އިތުރަށް ފުޅާކުރުމަށް ހިންގަން ރާވާފައިވާ މަޝްރޫޢުގެ އެއްބަސްވުމުގައި މާދަން ރޭ ސޮއިކުރާނެކަމަށް އިކޮނޮމިކް މިނިސްޓްރީން ބުނެފިއެވެ.
ހަނިމާދޫ އެއާޕޯޓު މަޝްރޫޢަކީ 2.1 ބިލިއަން ރުފިޔާގެ މަޝްރޫޢެކެވެ. މި މަޝްރޫޢަކީ އިންޑިއާ އެގްޒިމް ބޭންކުން ދިވެހި ސަރުކާރަށް ދީފައިވާ 800 މިލިއަން އެމެރިކާ ޑޮލަރުގެ ކްރެޑިޓް ލައިނުގެ ދަށުން ހިންގަން ހަމަޖައްސާފައިވާ މަޝްރޫޢެކެވެ.
މި މަޝްރޫޢު އިންޑިއާގެ ޖޭއެމްސީ ކުންފުންޏާ ހަވާލުކުރިިކަން އޯގަސްޓު މަހުގައި އިއުލާނުކުރި ނަމަވެސް އެ ކުންފުންޏާއެކު އެއްބަސްވުމުގައި ސޮއިކުރުން އެކި ސަބަބުތަކާހުރެ ފަސްވަމުން ގޮސްފައިވެއެވެ.
ކުރިން ސަރުކާރުން ވައުދުވެފައިވަނީ މި މަޝްރޫޢުގެ މަސައްކަތް އަންނަ އަހަރުގެ ޖޫން މަހުގެ ނިޔަލަށް ނިންމުމަށެވެ. ނަމަވެސް މިހާރު ސަރުކާރުން ބުނަމުންދަނީ މި މަޝްރޫޢު ނިންމައިލެވޭވަރުވާނީ 2024 ވަނަ އަހަރު ކަމަށެވެ.
