ފިސްތޯލެއް އޮތްކަމަށް ބުނި ހދ. ހަނިމާދޫ އިންޓަނޭޝަނަލް އެއާޕޯޓު މުވައްޒަފު ދޫކޮށްލައިފިއެވެ.
މައުލޫމާތު ލިބިފައިވާގޮތުގައި އޭނާ ދޫކޮލީ އިއްޔެ ހަވީރު 4 ޖަހާކަށްހާއިރުއެވެ. ދޫކޮށްލި ނަމަވެސް އަދި ވަޒީފާއަށް އެ މުވައްޒަފު ނުނެރޭކަމަށް މައުލޫމާތު ލިބިފަވެއެވެ.
ފުލުހުން ވިދާޅުވީ، އެ މީހާ އިއްޔެ ދޫކޮށްލާފައިވީ ނަމަވެސް މައްސަލައިގެ ތަހުގީގު އަދިވެސް ކުރިއަށްދާ ކަމަށެވެ.
އުމުރުން 37 އަހަރުގެ ފިރިހެން އެ މުވައްޒަފު ހައްޔަރުކުރީ ރައީސް ހދ އަދި ހއ އަށް ކުރައްވާ ދަތުރުގައި ހަނިމާދޫއަށް ފުލައިޓް ޖައްސަން ކައިރި ވެފައިވަނިކޮށް އޮޕަރޭޝަން ސައިޓުގައި މަސައްކަތް ކުރާ މުވައްޒަފުންގެ ހަށިގަނޑު ޗެކް ކުރަނިކޮށް އަތުގައި ފިސްތޯލެއް އެބައޮތް ކަމަށް ބުނުމުންނެވެ.
ބައިނަލްއަގުވާމީ އޭވިއޭޝަން އުސޫލުތައް ބުނާ ގޮތުން އާއްމުންގެ ރައްކާތެރިކަމާ ގުޅުންހުރި މިފަދަ ވާހަކަތައް ދެއްކުމަކީ މަނާ ކަމެކެވެ.
