އއ.ބޮޑުފޮޅުދޫ ސްކޫލްގައި އެރަށު އާރުބީޖީ ސްޕޯރޓްސް ކުލަބުން ބޭންކް އޮފް މޯލްޑިވްސް އަހަރެންގެ ބޭންކް ކޮމިއުނިޓީ ފަންޑްގެ އެހީގައި ގާއިމް ކުރި އާރުއޯ ޕްލާންޓް “މީރު ވާރޭފެން” ފްރޮޖެކްޓް ނިންމާ އޮކްޓޫބަރ 2 ވަނަ ދުވަހުގެ ރޭ ސްކޫލްގައި ބޭއްވި އެކަމަށް ހާއްސަ ރަސްމިއްޔާތެއްގައި ވަނީ ހަވާލުކޮށްފައެވެ.
މިރަސްމިއްޔާތުގެ ޝަރަފްވެރި މެހެމާނެއްގެ ގޮތުގައި ބޮޑުފޮޅުދޫ ކައުންސިލްގެ ރައީސް ޝުޖާއު އާދަމް ބައިވެރިވެފައިވާއިރު ސްކޫލްގެ ޕްރިންސިޕަލް އާއި ކައުންސިލް މެމްބަރުންނާއި،މުވައްސަސާތަކުގެ ވެރިންގެ އިތުރުން ސްކޫލްގެ ގްރޭޑް7 ން މަތީ ގްރޭޑްތަކުގެ ދަރިވަރުންނާއި ބެލެނިވެރިން ވަނީ ބައިވެރިވެފައެވެ. މިރަސްމިއްޔާތުގައި މޫސުން ގޯސްވުމާއި ގުޅިގެން ބޭންކް އޮފް މޯލްޑިވްސްގެ ފަރާތުން އެއްވެސް ބޭފުޅަކު ބައިވެރިވެފައެއް ނުވެއެވެ. މީރު ވާރޭފެން ޕްރޮޖެކްޓް ސްކޫލާއި ހަވާލު ކޮށްދެއްވީ އާރުބީޖީ ސްޕޯރޓްސް ކުލަބުގެ ރައީސް އިބްރާހިމް ނަސީމްއެވެ.
މިރަސްމިއްޔާތުގައި އެކުލަބުން ވަނީ އެރަށު ހެލްތު ސެންޓަރ އަށްވެސް ބައެއް ތަކެތި ހަވާލުކޮށްފައެވެ. މިރަސްމިއްޔާތުގައި ބޮޑުފޮޅުދޫ ސްކޫލްގެ ހުރިހާ ދަރިވަރުންނަށާއި މުވަްްޒިފުންނަށް ފެން އަޅާނެ ތިމާވެއްޓާ ރަށްޓެހި ރީތި ފުޅިއެއް ވެސް އެކުލަބުން ވަނީ ހަވާލުކޮށްފައެވެ.
މި ޕްރޮޖެކްޓަކީ އެރަށުގައި އެކުލަބުން ހިންގި ދެވަނަ ޕްރޮޖެކްޓްކަމަށާއި 2021 ވަނަ އަހަރު ޒަމާނީ މަސް ކަނޑާ އަށްޓެއް ވެސް ވަނީ އެރަށު ކައުންސިލް އާއި ހަވާލުކޮށްފައެވެ.
ކުޅިވަރު ކުލަބެއްނަމަވެސް އެރަށުގައި އެންމެ ހަރަކާތްތެރި ކުލަބެއްގެގޮތުގައި އިޖްތިމާއި ގިނަހަރަކާތްތަކެއް ހިންގަމުން އަންނަ އާރުބީޖީއިން ވަނީ 2021 ވަނަ އަހަރުގެ އެރަށު ކައުންސިލޔން ހޮވާ އެންމެ ހިންގުންތެރި ކުލަބް ޖަމިއްޔާގެ އެވޯޑް ހާސިލްކޮށްފައެވެ.
