މިލައުތުރު ސްޕޯޓްސް ފިއެސްޓާ ގްރޫޕް ސީ ގެ އެއްވަނަ ފުނަދޫ ހޯދިއިރު ދެވަނައަށް ކޮމަންޑޫ ހޮވިއްޖެއެވެ.
ގްރޫޕް ސީގެ މެޗުތައް އިއްޔެ ކުޅެ ނިމިފައިވާއިރު ގްރޫޕްގެ އެއްވަނައިގައި ފުނަދޫ އޮތީ ކުޅުނު ތިން މެޗުން ލިބުނު 9 ޕޮއިންޓާއި އެކުގައެވެ. 6 ޕޮއިންޓާއެކު ދެވަނަ ހޯދާފައި ވަނީ ކޮމަންޑޫއެވެ. ތިންވަނައިގައި 3 ޕޮއިންޓާއިއެކު ޅައިމަގު އޮތްއިރު ޕޮއިންޓެއް ނުލިބި ތާވަލުގެ ފުލުގައި އޮތީ މާއުނގޫދޫއެވެ.
ށ. އަތޮޅު ކައުންސިލުން އިންތިޒާމްކޮށްގެން ޓޫރިޒަމް މިނިސްޓްރީގެ އެހީތެރިކަމާއިއެކު ކުރިއަށް ގެންދާ ” ޓޫރިޒަމް 50، މިލައުތުރު ސްޕޯޓްސް ފިއެސްޓާ 2022” ފުޓްސަލް މުބާރާތުގައި އިއްޔެ ގްރޫޕް ސީގައި ފުނަދޫ ބައްދަލު ކޮށްފައި ވަނީ ޅައިމަގާއެވެ. މި މެޗު 5-1 ގެ ނަތީޖާއަކުން ކާމިޔާބު ކޮށްފައި ވަނީ ފުނަދޫންނެވެ. މި މެޗުގެ މޮޅު ކުޅުންތެރިއަކަށް ހޮވިފައި ވަނީ ފުނަދޫ ޓީމްގެ ޖޯޒީ ނަމްބަރު 8، އިބްރާހީމް އައިޝަމްއެވެ.
ދެވަނަ މެޗުގައި މާއުނގޫދޫއާއި ކޮމަންޑޫ ބައްދަލުކޮށް 2-0 ގެ ނަތީޖާއިން ކާމިޔާބު ކޮށްފައި ވަނީ ކޮމަންޑޫއެވެ. މި މެޗުގެ މޮޅު ކުޅުންތެރިއަކަށް ހޮވިފައި ވަނީ ކޮމަންޑޫގެ ޖޯޒީ ނަމްބަރު 32، ވިލްދާން އަހްމަދެވެ.
ގްރޫޕް އޭ އަދި ގްރޫޕް ބީގެ މެޗުތަކަށް ކަޅިއެއް
ގްރޫޕް އޭ: މިލަންދޫއާއި މަރޮށި ބައްދަލުކުރި މެޗު 2-1 ގެ ނަތީޖާއިން ކާމިޔާބު ކޮށްފައި ވަނީ މިލަންދޫއެވެ.
ގްރޫޕް ބީ: ފޯކައިދޫއާއި ފީވަށް ބައްދަލުކުރި މެޗު 1-0 ގެ ނަތީޖާއިން ކާމިޔާބު ކޮށްފައި ވަނީ ފޯކައިދޫއެވެ.
މި މުބާރާތުގައި މިއަދު ވެސް ހަތަރު މެޗު ކުޅުމަށް ވަނީ ހަމަޖެހިފައެވެ. އެއީ ގްރޫޕް އޭގެ 2 މެޗު އަދި ގްރޫޕް ބީގެ 2 މެޗެވެ.
