28 ރަށަކަށް ބޭނުންވާ ބިލިއާޑް ބޯޑު ކުޅިވަރާ ބެހޭ ވުޒާރާއިން ހަވާލުކޮށްފިއެވެ.
މި ބޯޑުތައް ހަވާލުކޮށްފައިވަނީ އެކަމަށްޓަކައި މޯލްޑިވްސް ޕޫލް ބިލިއާޑް އެސޯސިއޭޝަނުގައި އަންގާރަ ދުވަހު ބޭއްވި ރަސްމިއްޔާތެއްގައެވެ. ސަރުކާރުގެ ފަރާތުން ބިލިއާޑް ބޯޑުތައް ރަށްތަކާއ ހަވާލުކޮށްދެއްވީ ކުޅިވަރާ ބެހޭ ވަޒީރު އަޙްމަދު މަޚްލޫފެވެ. އަދި ބިލިއާޑް ބޯޑުތަކާއި ރަށްތަކުން ހަވާލުވީ އެ ދާއިރާގެ މެމްބަރުންނެވެ.
ބިލިއާޑް ބޯޑު ހަވާލުކުރެވުނު ރަށްތަކުގެ ތެރޭގައި ހިމެނެނީ ހއ. ދިއްދޫ، ކެލާ، މޮޅަދޫ ފިއްލަދޫ، ތަކުންދޫ، ށ. ކޮމަންޑޫ، ފޯކައިދޫ، މާއުނގޫދޫ، ނ. ކެނދިކުޅުދޫ، ރ. އުނގޫފާރު، ކ. މާފުށި، ހިންމަފުށި، އދ. ފެންފުށި، ދިއްދޫ، މ. މުލައް، ދިއްގަރު، ފ. މަގޫދޫ، ތ. ތިމަރަފުށި، މަޑިފުށި، ލ. ގަން، މާބައިދޫ، ގއ. ވިލިނގިލި، ކޮލަމާފުށި، ދާންދޫ، ގދ. ހޯނޑެއްދޫ، ތިނަދޫ، މަޑަވެލި އަދި އައްޑޫ ހިތަދޫ އާއި ހުޅުމާލެއެވެ. މީގެ ތެރެއިން ށ. ކޮމަންޑޫއަށް ވަނީ ދެ ބިލިއާޑް ބޯޑު ހަދިޔާކޮށްފައެވެ.
ސަރުކާރުން އަންނަނީ ރަށްތަކުގައި ކުޅިވަރުގެ ވަސީލަތްތައް ގާއިމުކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން މިހާރުވެސް 80 އަށްވުރެ ގިނަ ރަށުގައި ފުޓްބޯޅަ ދަނޑު ތަރައްގީކުރުމުގެ މަސައްކަތް ކުރަމުން އަންނައިރު، އެކި ރަށްތަކުގައި ވޮލީބޯޅަ ކޯޓުތަކާއި، ޓީޓީ ސެންޓަރުތަައް އަދި ބެޑްމިންޓަން ކޯޓުތައް ގާއިމުކުރުމުގެ މަސައްކަތްވެސް އަންނަނީ ކުރަމުންނެވެ
