ބީއެމްއެލް ހެކަތަން ކާމިޔާބުކުރި ފަރާތްތައް އިއުލާންކޮށްފިއެވެ. މިކަން އިއުލާންކުރީ ރޭ ހޮޓެލް ޖެންގައި ބޭއްވި ރަސްމިއްޔާތެއްގައެވެ.
ބީއެމްއެލް ހެކަތަން ކާމިޔާބުކުރީ ތިން ޓީމަކުންނެވެ. މިޓީމުތަކަކީ، ޑިޖިޓަލް އޮންބޯޑިންގ ހުށަހެޅި ޓީމު ކަމަށްވާ އަޙުމަދު މަޙުފޫޒު އާއި، ޙުސައިން ޒަޔާން އާއި، މޫސާ އިރުޝާންގެ އިތުރުން، އެކްސްޕެންސް ޓްރެކަރ ހުށަހެޅި ޓީމު ކަމަށްވާ، މުޙައްމަދު އާތިކް ޢަލީ ރިޟާ އާއި، ފާތިމަތު އަރީން ނަސީމް އާއި، މުޙައްމަދު ޔާނިއު ރަމީޒުގެ އިތުރުން ޕަރސަނަލް ފައިނޭންސް މެނޭޖަރ ހުށަހެޅި ޓީމު ކަމަށްވާ މުޙައްމަދު ޖައިލަމް، އިބްރާހިމް ހުސައިން ޝަރީފް، މުޙައްމަދު އީމާނެވެ.
ބީއެމްއެލުން ބުނީ، މި ހެކަތަން ބާއްވާފައިވަނީ ‘ބޭންކިންގ ސޮލިއުޝަންސް ޓު އެންހޭންސް ކަސްޓަމަރ އެކްސްޕީރިއެންސް’ ތީމްގެ ދަށުން ކަމަށެވެ. އަދި 30 އަށް ވުރެ ގިނަ ބައިވެރިންނާއެކު، 48 ގަޑިއިރަށް ދެމިގެންދިޔަ މި ހެކަތަންގައި ފިންޓެކްގެ ދާއިރާއިން އީޖާދީ ހިޔާލުތަކާއި ހައްލުތައް ވަނީ ހުށަހަޅާފައިވާ ކަމަށް ވެސް ބީއެމްއެލުން ބުނެއެވެ.
މިކަމާ ގުޅޭ ގޮތުން ބީއެމްއެލްގެ އިންޗާރޖް އަދި އެކްޓިންގ އެމްޑީ ޢާއިޝަތު ނޫރައްދީން ވިދާޅުވީ، ފިންޓެކް ކޮމިއުނިޓީ ގެ ފަރާތުން މި ހެކަތަން އަށް ދެއްވި ޝައުގުވެރިކަމަކީ އެކުންފުނިން ވަރަށް އުފާލާއެކު ބަލައިގަންނަކަމެއް ކަމަށެވެ. އަދި މި ހެކަތަން މެދުވެރިކޮށް ކަސްޓަމަރުންނަށް ފެންވަރު ރަނގަޅު ހިދުމަތްތަކެއް ފޯރުކޮށްދިނުމަށް ޑިވެލޮޕަރުންގެ ފަރާތުން މޮޅު ހިޔާލުތަކެއް ލިބިފައިވާ ކަމަށް ވެސް ނޫރައްދީން ވިދާޅުވިއެވެ.
މި ހެކަތަންގައި ހޮވުނު 3 ޓީމުން ހުށަހަޅާ ހިޔާލު ކާމިޔާބުކަމާއެކު ނިންމާލުމަށް ބީއެމްއެލް އިނޮވޭޝަން ލެބްގައި މަސައްކަތްކުރުމަށް 6 މަސް ދުވަހުގެ މުއްދަތެއް ލިބޭނެ ކަމަށް ބީއެމްއެލުން ބުނެއެވެ.
މި މުއްދަތުގައި ބޭންކުގެ ފަރާތުން، މަސައްކަތްކުރުމަށް ހާއްސަ އޮފީހެއް ހަމަޖައްސައިދިނުންމާއި، ކޮންމެ ޓީމަކަށް އެލަވަންސްގެ ގޮތުގައި މަހަކު 20،000 ރުފިޔާ ދިނުމުގެ އިތުރުން، ޑިވެލޮޕްކުރާ ސޮލިއުޝަންއަށް ދިގު މުއްދަތެއްގެ މެއިންޓެނަންސް ކޮންޓްރެކްޓެއް ވެސް ދިނުމަށް ވަނީ ހަމަޖެހިފައެވެ.
