ހއ.ދިއްދޫގައި އެއާޕޯޓެއް އަޅައިދެއްވާނެ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ހއ.އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި މިރޭ ދިއްދޫގައި ބޭއްވި ޖަލްސާގައި ވާހަކަދައްކަމުން ޔާމީން ވިދާޅުވީ ދިއްދޫ އަށް ކޮށްދޭންޖެހޭ އެއްވެސް ކަމެއް މި ސަރުކާރަށް ކޮށްދެވިފައި ނެތް ކަމަށާއި ދިއްދޫގެ ރައްޔިތުންގެ މަޖިލީހުގެ ގޮނޑި އެމްޑީޕީ އަށް ދިނީ އުއްމީދުތަކާއެކު ކަމަށެވެ.
އެ އުއްމީދު ނުފުދުމުން ރައްޔިތުން އަނެއްކާވެސް ކަންތައްތައް ކޮށްދޭން އެމަނިކުފާނުގެ ގާތުގައި ދަންނަވަމުންދާ ކަމަށާއި ޕީޕީއެމަށް ވެރިކަން ލިބިއްޖެނަމަ ދިއްދޫ ރައްޔިތުން ބޭނުންވާ ކަންކަން ކޮށްދެއްވާނެ ކަމަށް ޔާމީން ވިދާޅުވި އެވެ.
“އަޅުގަނޑުގެ ފަސް އަހަރެއްގެ ދައުރު ދެން ނިމިގެންދާނީ ހަމަ ގައިމުވެސް ދިއްދޫ ފަޅު ހިއްކާފައި، އެއާޕޯޓެއް އަޅާދީފައި.” ޔާމީން ވިދާޅުވި އެވެ.
ދިއްދޫގައި އެއާޕޯޓެއް އެޅި ނަަމަވެސް ދިވެހި ފަހުރުވެރިވާ ފަދަ ކުންފުންޏަކަށް އައިލޭންޑް އޭވިއޭޝަން ފުރަތަމަ އަލުން ހަދަންޖެހޭ ކަމަށްވެސް ޔާމީން ވިދާޅުވި އެވެ. އަދި ޕީޕީއެމަށް ދެން ވެރިކަން ލިބިއްޖެނަމަ ސަރުކާރުގެ ފުރަތަމަ ދުވަހު ވެސް ފަށާނީ ތަންފީޒީ އެޖެންޑާއަކުން ކަމަށާއި ކަންކަން ދިރާސާކުރަން ވަގުތު ނަގާލަން ބޭނުން ނުވާ ކަމަށް ޔާމީން ވިދާޅުވި އެވެ. އެގޮތުން މިހާރު މި ހިނގާ ދުވަސްތަކަކީ ދިރާސާކުރަން ލިބިފައިވާ ފުރުސަތެއް ކަމަށްވެސް ޔާމީން ވިދާޅުވި އެވެ.
