އައްޑޫ ސިޓިގައި މަސްހިފަން މޫދަށް ފޭބި މީހާ، ފަރުވާދެމުން އަންނަނިކޮށް ނިޔާވެއްޖެއެވެ.
މަސް ހިފަން މޫދަށް ފައިބައިގެން އުޅެނިކޮށް ގެއްލިގެން ހޯދަމުން ދަނިކޮށް ފެނިފައިވަނީ ޢުމުރުން 24 އަހަރުގެ ސ.ހިތަދޫ، ފެހިވިނަ، ޠަލާލް އަޙްމަދު ކަމަށެވެ.
އައްޑޫ އިކުއެޓޯރިއަލް ހޮސްޕިޓަލުން ބުނީ، އޭނާއަށް އިތުރު ފަރުވާދެމުން އަންނަނިކޮށް ނިޔާވެފައިވާކަމަށެވެ. އޭނާ ނިޔާވީ 13:05 ހާއިރުއެވެ. ހޮސްޕިޓަލުން ބުނީ، އޭނާ ފަރުވާ ދިނުމަށް ހޮސްޕިޓަލަށް ގެންދިޔައިރުވެސް ހާލު ސީރިއަސްކަމަށެވެ.
އެމްއެންޑީއެފް އިން ބުނީ އައްޑޫ ސިޓި ހިތަދޫއިން ފުރައިގެން މަސް ހިފަން ދިޔަ ޑިންގީއަކުން މަސް ހިފަން ފޭބި 2 މީހުންގެ ތެރެއިން އެކަކު ގެއްލިގެން ހޯދަމުން ދަނިކޮށް މޫދު އަޑިން ފެނިފައިވާކަމަށެވެ. އެ ހާދިސާ ހިނގައިގެން އުޅޭކަމުގެ މަޢުލޫމާތު ލިބިފައިވަނީ މެނދުރުކުރީ 11:32 ހާއިރުކަމަށް އެމްއެންޑީއެފް އިން ބުންޏެވެ.
