ސްޓޭޓް އެލެކްޓްރިކް ކޮމްޕެނީ (ސްޓެލްކޯ) އަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ދައްކަންޖެހޭ އެތައް މިލިއަން ރުފިޔާއެއް ނުދައްކާ ހުރުމުން، އެ އެސޯސިއޭޝަންގެ އޮފީސް ހިންގަމުންދާ އެފްއޭއެމް ހައުސް އިން ވަގުތީގޮތުން ކަރަންޓު ކަނޑާލައިފިއެވެ.
ސްޓެލްކޯއިން މިއަދު ބުނީ، އެފްއޭއެމުން ދައްކަންޖެހޭ 6.5 މިލިއަން ރުފިޔާ ދެއްކުމަށް އެކި ފަހަރު މަތިން އަންގާ، އެ ފައިސާ ދެއްކޭނެ ގޮތުގެ ޕްލޭނެއް ހުށަހެޅުމަށް ގިނަ ފުރުސަތުތަކެއް ދެވުނު ކަމަށެވެ. ނަމަވެސް އެކަންވެސް ކޮށްފައި ނުވާތީ، އެފްއޭއެމް ހައުސިން އިން ކަރަންޓް ކަނޑާލާފައިވާ ކަމަށް ބުންޏެވެ.
ސްޓެލްކޯއިން ބުނީ، އެ ފައިސާ ނުދައްކާ ނަމަ، އެފްއޭއެމްގެ އެހެން އިމާރާތްތަކުންވެސް ކަރަންޓުގެ ހިދުމަތް މެދުކަނޑާލުމަށް އެ ކުންފުނިން ވިސްނަމުންދާ ކަމަށެވެ.
