ގައުމީ ޔުނިވާސިޓީ، އެމްއެންޔޫގެ މެރިޓައިމް ސަވައިވަލް ސެންޓަރު ހެދުމުގެ މަޝްރޫއުގެ ދަށުން ޝީޓް ޕައިލް ކުރުމުގެ މަސައްކަތް އިއްޔެ ފަށައިފި އެވެ.
އެމްއެންޔޫގެ ފަރާތުން އެ މަޝްރޫއުގެ މަސައްކަތް އެމްޓީސީސީއާ ހަވާލުކޮށް، އެކަމުގެ އެއްބަސްވުމުގައި ސޮއިކުރީ 22 ޑިސެމްބަރު 2021ގަ އެވެ. މިއީ 4.59 މިލިއަން ރުފިޔާއަށް 210 ދުވަހުގެ ތެރޭގައި މަސައްކަތް ނިންމާ ގޮތަށް ހަވާލުކުރި މަޝްރޫއެކެވެ.
އެ މަޝްރޫއު ފެށުމަށް އެމްޓީސީސީން ސައިޓް މޮބިލައިޒް ކުރުމުގެ މަސައްކަތް ފެށީ މި މަހުގެ 13 ވަނަ ދުވަހު އެވެ.
މި މަޝްރޫއުގެ ދަށުން ޝީޓް ޕައިލްކޮށްފައިވާ 1،200 ކިޔުބިކް މީޓަރުގެ ލޭންޑް ފިލްކުރުމާއި 35 މީޓަރުގެ އެއްގަމު ތޮށި ޝީޓް ޕައިލްކުރުމާއި 27.25 މީޓަރުގެ އެއްގަމު ހުރަސް ތޮށީގައި ކޮންކްރިޓް ގާ ޖެއްސުމުގެ އިތުރުން 4.2 މީޓަރުގެ ދިގުމިނުގެ 6.4 މީޓަރުގެ ފުޅާމިނުގެ ރޭމްޕެއް ހެދުން ހިމެނެއެވެ. އަދި ވާ އައްސާ މޫރިން ބޮލާޑް ހަރުކުރާނެ އެވެ.
