ސިވިލް ކޯޓުގެ ޤާޟީ ޙަސަން ފަހީމު އިބްރާހީމުގެ މައްޗަށް ސުލޫކީ މައްސަލައެއް ސާބިތުވާކަމަށް ނިންމައި އޭނާއާމެދު ސުލޫކީ ފިޔަވަޅުއަޅަން ޖުޑީޝަލް ސާވިސް ކޮމިޝަން (ޖޭއެސްސީ)އިން ނިންމައިފިއެވެ.
އެ ކޮމިޝަނުން ނެރުނު ބަޔާނެއްގައި ބުނި ގޮތުގައި ހަތަރު މައްސަލައެއްގައި ފަނޑިޔާރުންގެ ސުލޫކާ ޤާޟީ ފަހީމު ޚިލާފުވެވަޑައިގެންނެވިކަމަށް ބުނެ އެ ކޮމިޝަނަށް މައްސަލަ ހުށަހަޅާފައިވެއެވެ. އެއިން 3 މައްސަލައެއްގައި އެ ކޮމިޝަނުން ނިންމާފައިވަނީ ޤާޟީ ފަހީމުގެ ސުލޫކަށް އަސަރުކުރާ ގޮތަށް އަމަލުކުރައްވާފައިވާކަމަށް އެ މައްސަލަތައް ތަހުގީގުކުރި ކޮމިޓީގެ މެންބަރުންނަށް ފެނިވަޑައިނުގަންނަވާ ކަމަށެވެ.
ނަމަވެސް އެ 4 މައްސަލައިން އެއް މައްސަލާގައި، މައްސަލަ ނިންމައި ހުކުމްކުރީ އެ މައްސަލައިގެ ޚަޞްމުންގެ ޣައިރު ޙާޟިރުގައިކަމަށް ފަހީމު އެއްބަސްވެވަޑައިގެންފައިވާ ކަމަށްވެސް ޖޭއެސްސީން ބުނެފައިވެއެވެ.
އެ މައްސަލާގައި ފަހީމު އަމަލުކުރައްވާފައިވަނީ ފަނޑިޔާރުންގެ ޤާނޫނުގެ 32 ވަނަ މާއްދާގެ (ހ)އާއި އެ ޤާނޫނުގެ 33 ވަނަ މާއްދާގެ (ށ)އާއި (ރ)ގައި މައްސަލައާ ގުޅޭ ގޮތުން ހުށަހަޅަންޖެހޭ ހެކި ޤަރީނާ ހުށަހެޅުމާއި، މައްސަލާގައި ދައްކަންޖެހޭ ވާހަކަތައް ޚަޞްމުން ނުވަތަ ޚަޞްމުންގެ ފަރާތުން ވަކާލާތުކުރާ ފާތްތަކުން ދެއްކުމަށް، އިޖުރާއާތުން ލާޒިމުކުރާ އެކަށީގެންވާ ފުރުސަތު ނުދެއްވައިކަމަށް ޖޭއެސްސީން ބުނެއެވެ.
އެހެންކަމުން އެ މައްސަލާގައި ފަހީމު އަމަލުކުރެއްވީ ފަނޑިޔާރުންގެ ސުލޫކާ ޚިލާފަށް ކަމުގައި ކަނޑައަޅައި، ސުލޫކީ އަދަބެއްގެ ގޮތުން ކޮމިޝަނުން އަންގާ ކޯހެއް ފުރިހަމަކުރުމަށް އެންގުމާއެކު ނަސޭހަތް ދިނުމަށް 19 އޮކްޓޯބަރުގައި އޮތް ކޮމިޝަނުގެ ބައްދަލުވުމުން ނިންމާފައިވެއެވެ.
