ހދ.ހަނިމާދޫ ހިމެނޭހެން ކުވެއިތު ފަންޑުން ތަރައްޤީކުރާ ހޮސްޕިޓަލުތައް އަލުން ބީލަމަށް ހުޅުވާލަންޖެހިފައިވާކަމަށް ފިނޭންސް މިނިސްޓަރ އަޙްމަދު އަމީރު ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ކުވެއިތު ފަންޑުގެ އެހީގައި ތ.ވިލުފުށީގައި ތަރައްޤީކުރާ ހޮސްޕިޓަލުގެ މަސައްކަތްތަކާއި ގުޅޭގޮތުން އެދާއިރާގެ މެމްބަރު ހަސަން އަފީފް މަޖިލީހުގައި ކުރެއްވި ސުވާލަށް ޖަވާބު ދެއްވަމުންނެވެ. މިނިސްޓަރ ވިދާޅުވީ ކުވެއިތު ފަންޑުގެ ދަށުން ތަރައްޤީކުރުމަށް ހަމަޖެހިފައިވާ ހޮސްޕިޓަލުތަކުގެ ބީލަމަށް ހުށައަޅާފައިވާ އަގުތަކަކީ މަޝްރޫޢުތަކަށްވުރެ ބޮޑެތި އަގުތަކެއްކަމަށެވެ. އެހެންކަމުން އަލުން މިމަޝްރޫޢުތައް ބީލަމަށް ހުޅުވާލުމުގެ މަސައްކަތް ކުރަމުންދާކަން ކުވެއިތު ފަންޑަށް އަންގާފައިވާނެކަމަށް މިނިސްޓަރ ވިދާޅުވިއެވެ.
އަމީރު އިތުރަށް ވިދާޅުވީ މިއަހަރު ނިމުމުގެ ކުރިން ބީލަމަށް ހުޅުވާލެވޭނެކަމަށް އުއްމީދު ކުރައްވާކަމަށެވެ. ކުވެއިތު ފަންޑުގެ އެހީގައި ހޮސްޕިޓަލް އެޅުމަށް ހަމަޖެހިފައިވާ 7 ރަށުގައި ތަރައްޤީކުރަނީ 30 އެނދުގެ ހޮސްޕިޓަލުތަކެކެވެ. އެ ރަށްތަކުގެ ތެރޭގައި ހިމެނެނީ، ހދ.ހަނިމާދޫގެ އިތުރުން، ށ.މިލަންދޫއާއި، ނ.ވެލިދޫއާއި، ކ.ތުލުސްދޫއާއި، އދ.މާމިގިނލިއާއި ވ.ފެލިދޫގެ އިތުރުން ތ.ވިލުފުށިއެވެ.
