12ރަށެއްގެ މަގުބައްތިތައް ބެލެހެއްޓުމާ ސްޓެލްކޯ އިން ހަވާލުވެއްޖެ އެވެ
ސްޓެލްކޯގައި ބޭއްވި ރަސްމިއްޔާތެއްގައި އެ ކުންފުނިން ވަނީ ވ. އަދި ކ. އަތޮޅުގައި ސްޓެލްކޯ އިން ހިދުމަތްދޭ ރަށްތަކުގެ މަގުބައްތިތައް މަރާމާތުކޮށް، ބެލެހެއްޓުމާ 12 ކައުންސިލާއެކު އެމްއޯޔޫއެއްގައި ސޮއިކޮށްފަ އެވެ.
އެ ކުންފުނިން އަލަށް މަގުބައްތިތަކާ ހަވާލުވި ރަށްތަކުގެ ތެރޭގައި މާލެ އަތޮޅުގެ ހަ ރަށަކާއި ވ. އަތޮޅުގެ ފަސް ރަށެއް ހިމެނެ އެވެ. އެއީ މާލެ އަތޮޅުން ގާފަރާއި ދިއްފުށްޓާއި ތުލުސްދު އާއި ހިންމަފުށްޓާއި ގުޅި އާއި މާފުށްޓެވެ. ދެން ހިމެނެނީ ވ. ފުލިދު އާއި ތިނަދު އާއި ފެލިދު އާއި ކެޔޮދޫގެ އިތުރުން ރަކީދޫ އެވެ.
ސްޓެލްކޯ އިން މިދިޔަ މަހު ވަނީ އއ. އަތޮޅާއި އދ. އަތޮޅުގައި އެ ކުންފުނިން ހިދުމަތް ދޭ 14 ރަށެއްގެ މަގުބައްތިތައް ބެލެހެއްޓުމާ ހަވާލުވެފަ އެވެ.
މި ރަސްމިިއްޔާތުގައި ވާޙަކަ ދައްކަވަމުން ސްޓެލްކޯގެ މެނޭޖިން ޑިރެކްޓަރު އަހުމަދު ޝަރީފް ވިދާޅުވީ، މިއަދު ސޮއިކުރެވިގެން ދިޔަ ކައުންސިލްތަކުގެ ތެރޭގައި ޕީޕީއެމްގެ ފަސް ކައުންސިލަކާއި އެމްޑީޕީގެ ހަތަރު ކައުންސިލެއްގެ އިތުރުން އަމިއްލަ ތިން ކައުންސިލެއް ހިމެނޭ ކަމަށެވެ. މި ކައުންސިލްތަކުގެ ތެރޭގައި މިި ސަރުކާރާ ސިޔާސީ ފިކުރު އެއް ގޮތް ނޫން ކައުންސިލްތައް ގިނަކަން ފާހަގަކުރައްވަމުން ޝަރީފް ވިދާޅުވީ ހިދުމަތް ދެމުން ދާނީ އެއްވެސް ކައުންސިލެއް ތަފާތުކުރުމެއް ނެތިކަމަށެވެ.
