ހދ. ހަނިމާދޫގައި ޓާފް އަޅައިގެން ތަރައްޤީ ކޮށްފައިވާ ފުޓްބޯޅަ ދަނޑުގައި ލައިޓް ސިސްޓަމް ޤާއިމް ކޮށްދޭނެ ބަޔަކު ހޯދުމަށް މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓުން އިޢުލާން ކޮށްފިއެވެ.
މި މަސައްކަތް ކޮށްދިނުމަށް ޝަޢުޤުވެރިވާ ފަރާތްތަކުން 01 ނޮވެމްބަރ 2022 ވާ އަންގާރަ ދުވަހުގެ 11:30 އަށް ޔޫތު މިނިސްޓްރީއަށް (ވެލާނާގޭ 3 ވަނަ ފަންގިފިލާ) ވަޑައިގެން އަންދާސީ ހިސާބު ހުށަހެޅުއްވުމަށް އެ މިނިސްޓްރީން އެދިލައްވައެވެ.
މި ޕްރޮޖެކްޓްގެ ދަށުން ހަނިމާދޫ ފުޓްބޯޅަ ދަނޑުގެ ދެ ފަޅީގައި، ކޮންމެ ފަޅިއަކަށް ހަތަރު ލައިޓް ޕޯސްޓް ޖެހުމަށް ވަނީ ހަމަޖެހިފައެވެ. މީގެ އިތުރުން ކޮންމެ ޕޯސްޓެއްގައި ހަތަރު ލައިޓް ހަރުކުރުމަށް ވަނީ ހަމަޖެހިފައެވެ.
މި ސަރުކާރުން ހަނިމާދޫގައި އެޅި ޓާފް ދަނޑުގެ މަސައްކަތްތައް ކުރިއަށް ދިޔަ ތާރީހުތަކަށް އަވަސް ނަޒަރެއް:
ހަނިމާދޫގައި ޒަމާނީ ޓާފް ދަނޑެއް އެޅުމަށްޓަކައި 26 ނޮވެންބަރ 2020 ގައި އާރު.ކޭ އެލް ކުންފުނީގެ ހެވީ ވެހިކަލްތަކާއި މުވައްޒަފުން ހަނިމާދޫއަށް އައިސްފައިވެއެވެ. އަދި 16 ފެބުރުއަރީ 2020 ގައި މަސައްކަތް ފެށިއެވެ. ބޭސް ހަދައި ނިމުނީ 21 އޮގަސްޓް 2020 ގައެވެ. އަދި ވެހިކަލްތަކާއި އެކު އެއަހަރުގެ ސެޕްޓެންބަރު މަހު އެކުންފުނިން ވަނީ ހަނިމާދޫއިން ފުރާފައެވެ.
21 ޖެނުއަރީ 2021 ގައި ދަނޑަށް ބޭނުންވާ ބައެއް ސާމާނު ގެނައެވެ. އެއީ ރަބަރެވެ. އަދި ފެބުރުއަރީ މަހު ކާޕެޓްރޯލްތައް ގެނެވުނެވެ. އަދި 3 ޖޫންގައި ދަނޑުގައި ކާޕެޓް އެޅުމުގެ މަސައްކަތް ކުރަން ފެށިއެވެ. އަދި މިމަހު 4 ވަނަ ދުވަހު މަސައްކަތް ވަނީ ނިމާލާފައެވެ. ދަނޑުގައި ކާޕެޓް އެޅުމުގައި ހަރަކާތްތެރިވީ ހަނިމާދޫ ޒުވާނުންނެވެ.
