ދަ ސްކައުޓް އެސޯސިއޭޝަން އޮފް މޯލްޑިވްސްގެ އައު ޗީފް ކޮމިޝަނަރގެ މަގާމަށް މައީދު މުޙައްމަދު ޒާހިރު އައްޔަންކޮށްފިއެވެ.
ސްކައުޓް އެސޯސިއޭޝަންގެ ޗީފް ކޮމިޝަނަރގެ މަގާމު ހުސްވެފައިވަނީ، އެ މަގާމުގައި ކުރިން ހުންނެވި އަޙުމަދު ހަނީފް އިސްތިޢުފާ ދެއްވުމާ ގުޅިގެންނެވެ.
އެއާއެކު ޗީފް ކޮމިޝަނަރގެ މަގާމަށް ޝައުގުވެރިވާ ފަރާތްތަކުން އެކަމަށް ކުރިމަތިލުމުގެ ފުރުސަތު ސްކައުޓް އެސޯސިއޭޝަނުން ހުޅުވާލާފައިވަނީ 12 އޮކްޓޫބަރު 2022 ގައެވެ. އެ ފުރުސަތުގައި ކުރިމަތިލީ މައީދު މުހަންމަދު ޒާޙިރު އެކަންޏެވެ.
އެހެންކަމުން، ޗީފް ކޮމިޝަނަރގެ މަގާމަށް މައީދު އައްޔަންކުރީ، ޗީފް ކޮމިޝަނަރ ހޮވުމާއި ޢައްޔަނު ކުރުމުގެ މިންގަޑުތަކާއި އުސޫލުތަަކަށް ރިއާޔަތްކޮށް، ގައުމީ ސްކައުޓް ކައުންސިލުން ކަނޑައެޅި ކޮމިޓީއަކުން ކުރިއަށް ގެންދިޔަ އިންޓަރވިއުއަށްފަހު ހުށަހެޅި ރިޕޯޓުގެ މައްޗަށް ބިނާކޮށް ކަމަށް ސްކައުޓް އެސޯސިއޭޝަނުން މައުލޫމާތު ދެއެވެ.
ޗީފް ކޮމިޝަނަރއަކީ، އެގްޒެކެޓިވް ކޮމިޓީއެއް އެކުލަވާލައިގެން ދުވަހުން ދުވަހަށް ސްކައުޓް އެސޯސިއޭޝަން ހިންގުމުގެ ޒިންމާ އުފުއްލަވާ ފަރާތެވެ.
މައީދު ވަނީ ވޯލްޑް އޮގަނައިޒޭޝަން އޮފް ދި ސްކައުޓް މޫވްމަންޓުގެ ޔޫތު އެޑްވައިޒަރެއްގެ ހައިސިއްޔަތުން 2014 އިން 2017 އަށް ތިން އަހަރު ހިދުމަތް ކުރައްވައިފަ އެވެ. އޭގެ ކުރިން އޭނާ އުޅުއްވީ އެ މޫވްމަންޓުގެ އޭޝިއާ ސަރަހައްދުގެ ޔަންގް އެޑަލްޓްސް ގްރޫޕްގެ ޗެއާމަންގެ މަގާމުގަ އެވެ.
މައީދަށް ވަނީ ސްކައުޓް ހަރަކާތުގައި ލިބޭ އެންމެ މަތީ އެވޯޑް، ރައީސުލްޖުމްހޫރިއްޔާގެ ސްކައުޓް ބެޖު ވެސް ލިބިވަޑައިގެންފަ އެވެ. ދުނިޔޭގެ ސްކައުޓް ޖަމާއަތުގެ އޭޝިއާ ސަރަހައްދުން 2019 ގައި ހޮވި “އައުޓްސްޓޭންޑިން” ފަސް ސްކައުޓުން ތެރޭގައި ވެސް މައީދު ހިމެނެ އެވެ.
