އޮންލައިންކޮށް ވޭޕް ވިއްކާ، ޑެލިވަރީ ކުރުމުގެ މަސައްކަތްކުރާ ފަރާތްތަކާއި މެދު ފިޔަވަޅު އަޅާނެ ކަމަށް ހެލްތު ޕްރޮޓެކްޝަން އޮތޯރިޓީ (އެޗްޕީއޭ) އިން ބުނެފިއެވެ.
އެޗްޕީއޭ އިން ނެރުނު އިއުލާނެއްގައި ވަނީ ދުންފަތުގެ ބާވަތްތައް ރަމްޒު ކޮށްދޭ ނަންބޯޑުތަކާއި އިލެކްޓޯނިކް ވިސީލަތްތައް ބޭނުންކޮށްގެން ސޯޝަލް މީޑިއާ އާއި އެހެނިހެން އޮންލައިން ޕްލެޓްފޯމްތަކުގައި ކުރަމުންދާ ދުންފަތުގެ އިޝްތިހާރުތައް ކުރުމަކީ ގާނޫނީ ގޮތުން މަނާކަމެއްކަމަށެވެ.
އަދި އޮންލައިން ވަސީލަތްތައް ބޭނުންކޮށްގެން ދުންފަތުގެ ބާވަތްތައް ވިއްކުމާއި އެފަދަ ބާވަތްތަކުގެ ނަންތައް ލިސްޓްކޮށް ފޮޓޯ އާއި މަންޒަރުތައް ޕޯސްޓްކުރުމާއި ދުންފަތުގެ ބާވަތްތަކާއި އެހެނިހެން ހިދުމަތްތަކާއި، ބާވަތްތައް އެއްކޮށް ޕެކް ކޮށްގެން ވިއްކުމާއި، ހިލޭ ބެހުމާ، ދުންފަތުގެ އެއް ބާވަތެއް އަނެއް ބާވަތަކަށްވުރެ ސިއްހީ ގޮތުން ރައްކާތެރިކަމަށް ބުނެ އިޝްތިހާރު ކުރުމަކީ ވެސް ގާނޫނުން މަނާކޮށްފައިވާ ކަމެއް ކަމަށެވެ.
މީގެ އިތުރުން އެ އިއުލާނުގައި ވަނީ ގާނޫނާއި އެއްގޮތަށް އެތެރެކޮށްފައިވާ ނުވަތަ އުފައްދާފައިވާ ދުންފަތުގެ ބާވަތްތައް، ވިޔަފާރިކުރާ ތަންތަނަށް ގޮސް ގަތުމަށް އެދޭ 18 އަހަރު ފުރިފައިވާ ފަރާތްތަކަށް ގާނޫނު ހުއްދަކުރާ މިންވަރަށް ދުންފަތުގެ ބަވާތްތައް ވިއްކުން ހުއްދަ ވާނެ ކަމަށެވެ.
ނަމަވެސް ވެންޑިން މެޝިން މެދުވެރިކޮށް، އޮންލައިންކޮށް އަދި ޑެލެވެރީ ހިދުމަތްފަދަ، ތަކެތި ގަންނަ ފަރާތަކީ ކާކުކަން އަދި އެ ފަރާތުގެ އުމުރު ކަށަވަރު ނުކުރެވޭ ވަސީލަތްތައް މެދުވެރިކޮށް ދުންފަތުގެ ބާވަތްތައް ވިއްކުމަކީ މަނާކަމެއް ކަމަށް އެ އިއުލާނުގައި ވަނީ ބުނެފައެވެ.
އެޗްޕީއޭއިން ވަނީ އޮންލައިންކޮށް ވޭޕް ވިއްކާ، ޑެލިވަރީ ކުރާ މީހުންނަށް ފިޔަވަޅު އަޅާނެކަމަށް ބުނެފައެވެ.
ދުންފަތް ކޮށްޓްރޯލް ކުރުމާބެހޭ ޤާނޫނުގައި ހިމެނޭ މުހިއްމުކަންކަން:
– ދުންފަތާ ދުންފަތް އުފައްދާ އެއްވެސް މާއްދާއެއްގެ އެއްވެސް މިންވަރެއް ހިމެނޭ އެއްޗަކީ ދުންފަތުގެ ބާވަތެއްކަން
– ވޭޕް، ޝީޝާ، ހީޓެޑް ޓޮބޭކޯ އަދި އީ-ސިނގިރޭޓުގެ ހުރިހާ ބާވަތައްވެސް ހިމެނެނީ ދުންފަތުގެ ބާވަތްތަކުގެ ތެރޭގައި
ދުންފަތުގެ ބާވަތްތައް ރަމްޒުކޮށްދޭ ނަންބޯޑުތަކާ، އިލެކްޓްރޯނިކް ވަސީލަތްތައް ބޭނުންކޮށްގެން ސޯޝަލް މީޑިއާ އާއި އެހެނިހެން އޮންލައިން ޕްލެޓްފޯރމް ތަކުގައި ކުރަމުންދާ ދުންފަތުގެ އިޝްތިހާރުތަކާ އޮންލައިން ވަސީލަތްތަށް ބޭނުންކޮށްގެން ދުންފަތުގެ ބާވަތްތަށް ވިއްކުމަށް އެފަދަ ބާވަތްތަކުގެ ނަންތައް ލިސްޓްކޮށް ފޮޓޯ އާއި މަންޒަރުތަށް ޕޯސްޓުކުރުމުމަކީ މި ޤާނޫނުގައި މަނާކުރާކަމެކެވެ. އަދި ދުންފަތުގެ ބާވަތްތައް އެހެނިހެން ޚިދުމަތްތަކާ ނުވަތަ ބާވަތްތަކާ އެއްކޮށް އަގުކޮށް (ޕެކް ކޮށްގެން) ވިއްކުމާ، ހިލޭ ބެހުމާއި، ދުންފަތުގެ އެއް ބާވަތެއް އަނެއް ބާވަތްތަކަށްވުރެއް ޞީއްޙީ ގޮތުން ރައްކާތެރިކަމަށް ނުވަތަ ގެއްލުމެއް ނުވާކަމަށް ނުވަތަ ގެއްލުން ކުޑަކަމަށް ނުވަތަ ދުންފަތުގެ އެއްވެސް ބާވަތަކުން ޞިއްޙީ ފައިދާއެއް ލިބޭކަމަށް ބުނެ އެފަދަ އުފެއްދުންތައް ޕްރޮމޯޓް ކުރުމާއި، ޕްރޮމޯޓް ވާނޭފަދަ ގޮތަކަށް އަމަލު ކުރުން ވެސް ހިމެނެނީ ޤާނޫނު މަނާ ކުރާ ކަންކަމުގެ ތެރޭގައެވެ.
މި ޤަވާއިދުގެ ދަށުން ދުންފަތުގެ ވިޔަފާރިކުރާ ފަރާތްތަކުން ދުންފަތުގެ ބާވަތްތައް އިޝްތިހާރު ނުވާނޭހެން ދޭދޭ ވިޔަފާރިތަކުގެ މެދުގައި ކުރާ މުއާސަލާތަކާ ފިހާރަތަކުގައި އިޝްތިހާރުވާނޭހެން އަދި ދުންފަތުގެ ބާވަތްތަކުގެ ޕެކެޓް ބޭރުގައި ޖެހުމަށް ޤާނޫނޫ ލާޒިމު ކުރާ ޞިއްޙަތުގެ އިންޒާރު ނުފޮރުވޭގޮތަށް އަދި މަގު ހިނގާ މީހުންނަށް ނުފެންނަގޮތަށް ޑިސްޕެންސަރގައި ނުވަތަ ރެކް ތަކުގައި ދުންފަތުގެ ބާވަތްތަށް ބެހެއްޓުމަކީ މަނާކަމެކެވެ.
ވަކި ބްރޭންޑެއް ތަފާތު ނުވާނޭހެން އަދި ބްރޭންޑްގެ އެއްވެސް ސިފައެއް ނުހިމެނޭގޮތަށް ސާދާ އަކުރުން ކަޅާ ހުދުން އަގު ލިސްޓެއް ބެހެއްޓުމަށް ޤާނޫނު ހުރަހެއް ނާޅައެވެ. އެހެންނަމަވެސް ވެންޑިން މެޝިނާއި އޮންލައިންކޮށް އަދި ޑެލިވަރީ ޚިދުމަތް ފަދަ ގަންނަ މީހާގެ އުމުރު ކަށަވަރު ނުކުރެވޭ ވަސީލަތްތައް މެދުވެރިކޮށް ދުންފަތުގެ ވިޔަފާރި ކުރުމަކީ މަނާކަމެކެވެ.
